«Առաջին լրատվական»-ի զրուցակիցն է ԱԺ ՀՀԿ-ական պատգամավոր Կարինե Պողոսյանը:
– Տիկին Պողոսյան, մեծամասնական ընտրակարգով ընտրված պատգամավորներդ հավաքվել եք Հանրապետական կուսակցության «Այո»-ի շտաբում: Կասե՞ք, թե ինչ հարցեր եք քննարկել կամ ինչ հանձնարարականներ եք ստացել:
– Ընդամենը հստակեցնում էինք մեր անելիքները: Մարզային շտաբները դեռ չեն ձևավորվել, դրանք կբացվեն նոյեմբերի 6-ին: Մի փոքր հստակեցումներ և հանձնարարականներ եղան անելիքների վերաբերյալ, թե ինչպես պետք է կազմակերպենք քարոզարշավը:
– Ինչպե՞ս պետք է կազմակերպեք:
– Հանդիպումներ ժողովրդի հետ, նրանց իրազեկել ու ծանոթացնել սահմանադրական փոփոխությունների մասին:
– Իսկ սահմանադրական փոփոխություններն ինչպե՞ս պետք է բացատրեք կամ իրազեկեք ժողովրդին, որ «այո» քվեարկեն:
– Մենք ներկայացնելու ենք սահմանադրական փոփոխությունների նախագծում առկա բոլոր դրական փոփոխությունները, մնացածը թող մնա իրենց խղճին:
– Այդ փոփոխություններից ամենաշատը ո՞րն է Ձեզ դուր եկել, որն եք ավելի շատ կարևորում:
– Առաջին հերթին այն, որ երկու տասնամյակից ավելի նույն Սահմանադրությամբ ենք առաջնորդվում: Ճիշտ է, 10 տարի առաջ տեղի ունեցան որոշակի փոփոխություններ, բայց աշխարհը առաջ է շարժվում, զարգանում է, իսկ մենք այսքան ժամանակ նույն Սահմանադրությամբ ենք: Փորձենք մենք էլ մեր փոփոխություններով հանդերձ ավելի լավ քաղաքականություն վարել:
– Այսինքն՝ դուք գտնում եք, որ Սահմանադրությունը պետք է երբեմն փոխե՞լ:
– Այո՛, երբեմն, և հիմա իրոք ժամանակն է: Ժամանակներին համապատասխան մենք էլ պետք է այդ փոփոխություններն անենք, որ մեր երկիրն ավելի լավ զարգանա:
– Ասում են՝ Ամերիկայի Միացյալ Նահանգների Սահմանադրությունը շատ հին է՝ 200 տարեկան է, բայց այդ երկիրը լավ էլ զարգանում է:
– Եթե մենք էլ լինեինք ԱՄՆ-ի նման երկիր, միգուցե մեզ էլ պետք չէր լինի նման փոփոխություններ անելը: Հաշվի առնելով մեր ներքին, նաև արտաքին շատ հարցերը՝ այդ փոփոխություններն անհրաժեշտ էին:
– Իսկ այս փոփոխությունների ադյունքում հնարավո՞ր է Հայաստանը դառնա ԱՄՆ-ի նման երկիր:
– Թող դառնա, ու Սահմանադրությունը չփոխվի:
– Կարծիք կա, որ հանրաքվեի համար դժվար կլինի մարդկանց ընտրատեղամասեր բերելը, քանի որ սա խորհրդարանական կամ նախագահական ընտրությունները չեն, որ նրանք հասկանան, թե ում են ընտրելու:
– Դրա համար էլ մենք պետք է ճիշտ բացատրենք բոլոր փոփոխությունները: Իմ շրջապատում ես խոսակցություններից արդեն հասկացել եմ, որ շատ լավ էլ պատրաստակամ են, որ գան ու քվեարկեն: Ես էլ քանի որ մեծամասնականով ընտրված պատգամավոր եմ, անպայման գնալու եմ և հանդիպելու եմ ժողովրդի հետ, ու նրանց ուղղելու եմ իմ հորդորը, իմ խոսքը:
– Բա որ Ձեզ ասեն՝ ինչու եք եկել, մեր երկիրը սոցիալապես վատ վիճակում է, մենք անապահով ենք, իսկ Դուք այսպես շքեղ հագնված, մեզ քարոզում եք կողմ քվեարկել սահմանադրական փոփոխություններին, ի՞նչ եք ասելու:
– Համոզված եմ, որ դա գործին չի խանգարի:
– Դուք, ըստ երևույթին, ընտրությունների նախապատրաստական աշխատանքների այնքան էլ մեծ փորձ չունեք, ինչպե՞ս պետք է «այո»-ի քարոզարշավին մասնակցեք:
– Այդպես չէ: Ես 15-20 տարի տարբեր ընտրությունների ժամանակ մարզային հանձնաժողովներում եմ եղել և շատ լավ պատկերացնում եմ այդ աշխատանքները:
– Այդ տարիներին Հովիկ Աբրահամյանը կամ Ջոնիկ Աբրահամյանը մեծամասնական ընտրակարգով մասնակցել են ընտրություններին, և կարծիք կա, որ ընտրությունները կեղծվել են:
– Դա աբսուրդի դաշտից է: Միշտ էլ շատ նորմալ, շատ բարձր մակարդակի ընտրություններ են եղել:
– Մարդիկ Ձեզ կարող են նաև հարցնել, թե ի՞նչ եք արել մարզի, քաղաքի ժողովրդի համար, որ ուզում եք «այո» քվեարկենք:
– Արտաշատ քաղաքում տեսանելի մեծ գործեր են արվել՝ տանիքների, փողոցների, բակերի բարեկարգման աշխատանքներ, խաղահրապարակների կառուցում: Եվ ոչ միայն՝ իրենց միջոցներից հիվանդ մարդկանց բուժման համար գումար է տրվել:
– Արարատի մարզում մեծ է նաև բերքի իրացման խնդիրը: Մարդիկ ողջ տարի մշակում են իրենց դաշտերը, բայց աշնանը չեն կարողանում մթերման հանձնել ստացված խաղողը, բանջարեղենը:
– Ի շնորհիվ մեր ղեկավար անձանց, մեր վարչապետի, ով մի քանի անգամ հանդիպեց մեր ժողովրդի հետ, մարզպետին հանձնարարականներ տվեց, այդ խնդիրը լուծվեց: Դաշտերում չմթերված խաղող, չմթերված բերք չի մնացել: Իսկ առաջիկայում փորձում են միջնորդել, ընդառաջել, որ գյուղացիները ստանան իրացրած բերքի գումարները:
