«Առաջին լրատվական»-ը ներկայացնում է «Բողոք երկրի սրտից» հաղորդաշարի հերթական թողարկումը: Երկրի սրտում՝ Հանրապետության հրապարակում, իր բողոքն է հայտնում Էջմիածնի բնակիչ Ցողիկ Վարդանյանը: Տիկին Ցողիկը պնդում է, որ խաբեության զոհ է դարձել:
«Ապրում եմ Մաշտոցի 59/52 հասցեում՝ 5 շնչով, ամուսինս մի քանի տարի է, ինչ մահացել է, հիմա նրա եղբայրները ուզում են մեր տան համասեփականատեր դառնան՝ ծանոթների, փողերի միջոցով»,- նշեց նա՝ մանրամասնելով, որ 2004թ. դատարան հայց է ներկայացրել տիրապետման հիմքով անշարժ գույքի սեփականատեր ճանաչվելու պահանջով, ներկայացրել է բոլոր փաստաթղթերը, քաղաքապետարանի ներկայացուցիչը բանավոր հայտնել է, որ հայցի դեմ չի առարկում, սակայն հետագայում պարզվել է, որ գրավոր առարկություն է ներկայացրել դատարան:
«Ամուսնուս մեծ եղբայրը ժամանակին ստացել է բարելավում, բնակարան ունի, սեփական հողամաս, սակայն աչք է դրել նաև այս բնակարանի վրա, այնինչ ինքը այստեղ չի էլ ապրում, 30 տարի վարձերը ես եմ մուծում, փոքր եղբորն է իր տեղը ուղարկել մեր հետ ապրելու, բայց նա էլ ոչ մի գրոշ չի մուծել, քաղաքապետարանում գիտեն: Քաղաքապետի՝ Կարեն Գրիգորյանի հետ խոսել եմ, ասել է, թե չի առարկում, որ ես տունը սեփականաշնորհեմ, բայց դատարանում քաղաքապետարանի իրավաբանը այլ բան ասեց, հիմա էլ քաղաքապետն ասում է՝ հաշտության եկեք, ոնց հաշտության գամ, եթե դա իմ տուն է, իրենց բնակարան տվել են»,- մանրամասնեց տիկինը:
Ցողիկ Վարդանյանը տեղեկացրեց, որ դիմել է Վարչական ու Վերաքննիչ քաղաքացիական դատարաններ, բայց անարդյունք, քանի որ իրեն անգամ իր փաստաբաններն են խաբել, գումար են վերցրել գործերը կիսատ-պռատ արել, տեգրոջ հետ համաձայնության են եկել ու խաբել. «Եթե Էջմիածնի քաղաքապետարանում ցանկանան՝ խնդրին լուծում կտան, այնինչ դատարանի թուղթ են ուզում, դատարանն էլ քաղաքապետարանին է պաս տալիս»:
Մանրամասները՝ տեսանյութում: