Ցմահ ազատազրկման դատապարտված, 21 տարի անազատության մեջ գտնվող, սակայն օրերս ազատություն ստացած հետախույզ Սողոմոն Քոչարյանը շարունակում է մնալ հիվանդանոցում՝ բայց բժիշկների հսկողության տակ։
Քոչարյանի փաստաբան Գրիշա Բալասանյանն «Առաջին լրատվական»-ի հետ զրույցում ասաց, որ Քոչարյանը ներկա պահին դուրսգրման ենթակա չէ, սակայն առաջիկա օրերին կորոշվի՝ կտեղափոխեն նրան տուն, թե ոչ։ «Սողոմոն Քոչարյանի մոտ, տուն գնալու հետ կապված հակասական տրամադրություն է։ Մեկ շատ է ուզում դուրս գրվել հիվանդանոցից, մեկ էլ փոշմանում է, ուզում է մնալ, ապաքինվել։ Ասում է՝ ուզում եմ երկու ոտքով տուն գնալ»,- ասաց Բալասանյանը։
Փաստաբանը նաև ասաց, որ բժիշկներն անում են հնարավորը, որպեսզի Քոչարյանի առողջական վիճակը կայունանա։
Սողոմոն Քոչարյանի մայրն էլ՝ Զինա Քոչարյանն «Առաջին լրատվական»-ի հետ զրույցում ասել էր, որ որդին ամենաշատն ուզում է տուն գնալ «տաք ջրով լոգանք ընդունելու համար», որը իրեն դեռ չի թույլատրվում։
Նշենք, որ Սողոմոն Քոչարյանը ներկայումս գտնվում է Սուրբ Գրիգոր Լուսավորիչ բժշկական կենտրոնի Սրտաբանական բաժանմունքում: Նա, բացի սրտային անբավարարությունից՝ տառապում է մի շարք այլ հիվանդություններով։ Հենց ծանր հիվանդությունների հիմքով էլ Քոչարյանը հոկտեմբերի 22-ին դատարանի որոշմամբ ազատ արձակվեց։
