Այսօր Մոսկվայում Տնտեսության արդիականացման հանձնաժողովի և «Սկոլկովո»-ի հոգաբարձուների խորհրդի նիստի ժամանակ Ռուսաստանի Դաշնության նախագահ Դմիտրի Մեդվեդևը նվեր է ստացել հերթական պլանշետային համակարգիչը: Այս անգամ նվերը հանձնել է RIM (Research In Motion Ltd) ընկերության ղեկավար Ջեյմս Լոուրենս Բալսիլլին, որին պատկանում է Blackberry ապրանքանիշը:
«Ես նկատեցի, որ դուք iPad 2-ով աշխատում, փորձե՛ք մեր նոր սարքը»,- ասել է Բալսիլլին: Այս մասին հաղորդում է ITAR-TASS գործակալությունը:
Հիշեցնենք, որ անցած տարի Կալիֆոռնիա կատարած այցելության ժամանակ Դմիտրի Մեդվեդևը Apple ընկերության ղեկավար Սթիվ Ջոբսից ստացել էր այդ ընկերության պլանշետային iPad համակարգիչը, իսկ այս տարի Մեդվեդևին ուղարկել էին նաև դրա նորացված iPad 2 տարբերակը:
Տեղեկացնենք նաև, որ RIM-ի BlackBerry PlayBook պլանշետային համակարգիչներն անցած շաբաթ են մտել շուկա և հիմա վաճառվում են ԱՄՆ-ի ու Կանադայի շուկաներում: Մասնագետները նշում են, որ BlackBerry PlayBook-ը կարող է հանգիստ մրցակցության մեջ մտնել Apple-ի iPad-ի հետ: