Վայոց Ձորի մարզում գյուղացիները կանգնել են փաստի առջև. թեև խաղողի մթերումների գինը մարզում սահմանվել է 180-210 դրամ, խաղողը չեն կարողանում մթերել անգամ 150 դրամով: Աղավնաձոր գյուղի բնակիչները նշում են, որ հոկտեմբերի 16-ին ճանապարհ էլ էին փակել, մարզպետը եկել էր, մթերումների խոստում տվել, վստահեցրել, որ վարչապետի հրահանգ կա, բայց, գյուղացիների խոսքով, կա՛մ գյուղացիներին խաբել են, կա՛մ վարչապետի հրահանգին ենթարկվողներ չկան:
Գյուղացիները պատմում են, որ մթերող ընկերությունները տարբեր պատճառաբանւթյուններ են բերում բերքը ամբողջությամբ չմթերելու համար, խաղողը տոննաներով վազերին չորանում է:
Մարզում վերամշակող ընկերություններն էլ պարզաբանում են, թե այս տարի իրենք ընդհանրապես խաղող չէին կարող մթերել, բայց քանի որ գյուղացու բերքը շատ է, կառավարությունը որոշել է լայնածավալ մթերումներ կատարել:
Գետափի գինու գործարանում նշեցին, որ իրենց արտադրանքի իրացման ծավալները կրկնակիից ավել կրճատվել են: Արտահանման հիմնական շուկան Ռուսաստանն է, որտեղ էլ ռուբլու քաոս է:
