Նոյեմբերի 2-ին, կավարտվի ԱՄՆ պետքարտուղարության կողմից ամեն տարի հայտարարվող «Բազմազանության արտոնագիր» վիճակախաղի 2017 թվականի խաղարկության գրանցման գործընթացը:
Ամեն տարի այս ծրագրով խաղարկվում է 50.000 վիզա այն երկրների քաղաքացիների շրջանում, որոնք ունեն ԱՄՆ ներգաղթի համեմատաբար ցածր ցուցանիշներ: Վիզաները պատահական ընտրության սկզբունքով խաղարկվում են որոշակի հստակ պայմանների բավարարող և խաղարկության համար գրանցված մասնակիցների շրջանում:
Ըստ Հայաստանում ԱՄՆ հյուպատոս Ֆրենք Տուի՝ անցած տարում այս ծրագրով Հայաստանում թողարկվել է 1679 վիզա: Այս ցուցանիշով Հայաստանը տարածաշրջանում ակնհայտ առաջատար է։ Ընդ որում, ըստ հյուպատոսի, «Գրին քարտի» խաղարկությանը Հայաստանից աննախադեպ մասնակցություն է արձանագրվել. խաղարկության մասնակցության համար աշխարհով մեկ ներկայացված 14 միլիոն հայտերից 56 հազար 519-ը ստացվել էին Հայաստանի քաղաքացիներից:
Այն, որ Հայաստանի քաղաքացիներն առավելագույնս են հետաքրքրված «Գրին քարտի» խաղարկությամբ «Առաջին լրատվական»-ի հետ զրույցում փաստեցին խաղարկության հայտերի գրանցման գործակալությունից։
Դիմողների տարիքային խումբն ու մասնագիտական ցենզը տարբեր է։
Թեև հայտում խաղարկությանը մասնակցելու մոտիվացիան չի նշվում, սակայն հենց գրասենյակի մոտ մենք հանդիպեցինք բազմաթիվ քաղաքացիների, ովքեր ուզում էին «Գրին քարտ» շահել տարբեր նպատակներով, սակայն դեպի ԱՄՆ կանաչ լույսի հնարավորություն ստանալու գերակա ցանկությունը կրթությունը շարունակելն էր։