Լոռու մարզի ընդհանուր իրավասության դատարանում Մուշեղ Հարությունյանի նախագահությամբ ավարտվել է Սամվել Ս.-ի գործի դատական քննությունը:
64-ամյա Սամվելը մեղադրվել է պոռնկությանը նպաստելու համար՝ ՀՀ քրեական օրենսգրքի 262 հոդվածի 1-ին մասով:
Ըստ մեղադրանքի՝ «Օլիգոֆրենիա» հիվանդությունն ունեցող Սամվել Ս.-ն 2015 թվականի ապրիլ-մայիս ամիսներին Վանաձորում գտնվող իր բնակարանի սենյակը պոռնկությամբ զբաղվելու համար պարբերաբար տրամադրել է մարմնավաճառուհի Նարինե Շ.-ին՝ յուրաքանչյուր անգամ կացարան տրամադրելու համար մարմնավաճառի զուգընկերներից ստանալով 1000-2000 դրամ գույքային օգուտ:
Դատարանում ամբաստանյալն ընդունել է իրեն առաջադրված մեղադրանքը, միջնորդել է գործը քննել արագացված կարգով:
Դատարանը հաշվի է առել, որ ամբաստանյալը թոշակառու է, հիվանդ, նա զղջացել է կատարածի համար, նախկինում դատված չի եղել:
Սամվել Ս.-ն մեղավոր է ճանաչվել մեղսագրված արարքի համար ու դատապարտվել է 200 հազար դրամ տուգանքի:
Տուգանքի վճարումը տարաժամկետվել է ու վճարման համար սահմանվել է 10 ամիս ժամանակ. յուրաքանչյուր ամիս Սամվել Ս.-ից կբռնագանձվի 20 հազար դրամ:
