Հոկտեմբերի 10-ից մեկնարկել է սահմանադրական փոփոխությունների հանրաքվեի քարոզարշավը: «Առաջին լրատվական»-ի հետ զրույցում ԱԺ պետաիրավական հարցերի հանձնաժողովի նախագահ, ՀՀԿ խմբակցության պատգամավոր Հովհաննես Սահակյանը առայժմ տեղյակ չէ, թե ով է ղեկավարելու իրենց կուսակցության ընտրական շտաբը:
Դիտարկմանը, թե ինչու «այո»-ի կողմնակիցները քարոզարշավի ժամանակ չեն համախմբվում, և ինչ կնշանակեր Արծվիկ Մինասյանի տեսակետը, թե ոչ բոլոր հանրապետականներն են «այո»-ի կողմնակից, Հովհաննես Սահակյանը պարզաբանեց. «Եթե կա ՀՀԿ մոտ 100 հազար անդամ կամ հետևորդ ու համակիր, ապա կդժվարանանք ասել, որ այս բուրգը միաձայն ասելու է «այո»: Բովանդակային քննարկման ժամանակ բավականին առաջարկներ եղան նաև մեր խմբակցության պատգամավորների կողմից, այսինքն՝ նրանց համար նախնական տեքստը ընկալելի չէր»:
Այսօր սահմանադրական փոփոխությունների քննարկման ժամանակ ՀԱԿ խմբակցության ղեկավար Լևոն Զուրաբյանը հրապարակավ հայտարարեց, որ ՍԴ-ն կաշառել է Վենետիկի հանձնաժողովի նախագահին: Այս առնչությամբ Սահակյանն ասաց. «Ես ուրախ եմ, որ իմ գործընկերը ընդամենը հռետորական հարցադրում կամ քաղաքական հայտարարություն չի արել նման կարևորագույն հարցի վերաբերյալ: Եթե ունի նմանատիպ փաստեր, ապա ես վստահ եմ, որ ծանրակշիռ փաստերի դեպքում իրավապահները մեղավորներին կպատժեն: Հակառակ դեպքում հետևանքը կլինի քաղաքական, այսինքն՝ ժողովուրդը կտա իր գնահատականը»:
Մեկնաբանելով Սերժ Սարգսյանի հայտարարությունը, թե ինքը գիտի, ով կարող է լինել երկրի հաջորդ նախագահը, Սահակյանը դա կապեց ոչ թե կոնկրետ մարդու, այլ մարդու տեսակի հետ, թե ինչպիսի մարդ կարող է ղեկավարել մեր երկիրը:
