Հայաստան-Եվրամիություն հարաբերությունները կարծես նոր փուլ են ուզում թևակոխել: Կա՞ Հայաստանի համար եվրոպական ապագա, այն իրավիճակում, երբ Հայաստանը ԵՏՄ անդամ է և մասնակցում է ուսական գրեթե բոլոր նախագծերին՝ թե՛ տնտեսական, թե՛ անվտանգության: Այս հարցի շուրջ «Առաջին լրատվական»- ի հետ զրույցում իր դիտարկումները ներկայացրեց փորձագետ Ստյոպա Սաֆարյանը. «Ռուսաստանը Եվրասիական ինտեգրացիոն նախագիծը հորինել է ուղղակի թույլ չտալու համար շահերի առաջմղում կամ ամրապնդում:
Մենք գործ ունենք ինտեգրացիոն նախագծի տակ թաքնված բավականին հարձակողական իրավիճակի հետ. Ռուսաստանը ստեղծել է երկու մոդել. առաջինը Ուկրաինայի մոդելն է. այսինքն՝ ով իրեն չենթարկվի, կարժանանա Ուկրաինայի ճակատագրին, երկրորդը Հայաստանի մոդելն է, այսինքն՝ ենթարկվելու: Ռուսաստանը այս երկու մոդելն էլ ստեղծել է և ասում է՝ դուք որոշեք, թե ինչպիսի մահ եք ընտրում: Ուկրաինան կորցրեց Ղրիմը, բայց պահեց Կիևը, իսկ մենք կարող ենք կորցնել Երևանը:
Ռուսաստանը Հայաստանին վերցրել է, աշխատում է Ադրբեջանին վերցնելու ուղղությամբ: Եվ եթե այս երկու երկրներին վերցնի, ապա Վրաստանը կհայտնվի խոցելի վիճակում: Երբ կլուծվի Ադրբեջանի հարցը, մենք կտեսնենք նաև Վրաստանի դրաման:
Հայաստանը պետք է այս պահը օգտագործի, և ինչպես Աստանայում Հայաստանի անդամակցության հարցը վերածեցին ծաղրուծանակի՝ Ղարաբաղի մասով, այնպես էլ այժմ Հայաստանը պարտավոր է ԵՏՄ-ում դնել Ադրբեջանի վետոյի խնդիրը՝ առանց սահմանները ճշգրտելու: Սա, թերևս, միակ բանն է՝ փրկելու տարածաշրջանային դինամիկան»:
