«Առաջին լրատվական»-ի հետ զրույցում ԱԺ ՀԱԿ խմբակցության պատգամավոր Լյուդմիլա Սարգսյանը նշեց, որ կոռեկտ չի համարում սահմանադրական փոփոխություններին «կողմ» քվեարկողներին դավաճան համարելը և հավելեց. «Իսկ ո՞վ ասաց, որ նվիրյալներն իրենք են: Ես միամիտ չեմ, որ չհասկանամ, որ այս պահին բոլոր արատները վերացնել այս սահմանադրությամբ հնարավոր չէ, որովհետև կան ընդունված խաղի կանոններ, որոնք պետք է քիչ-քիչ բարեփոխել, դա միանգամից տեղի չի ունենա: Բայց ես համամիտ չեմ, որ այս սահմանադրութունը միտված է միայն Սերժ Սարգսյանի վերարտադրությանը: Նա վերարտադրվելու հնարավորություն ունի նաև գործող սահմանադրությամբ»:
Անդրադանալով Ռ. Քոչարյանի հարցազրույցին և քաղաքականություն նրա հնարավոր վերադարձին՝ մեր զրուցակիցը նշեց. «Այն, ինչ տեղի է ունեցել 2008թ., դա պիտի որ զսպաշապիկ լիներ Քոչարյանի համար՝ վերադարձի մասով: Բայց եթե ինքը կորոշի վերադառնալ, թող ժողովուրդը որոշի, թե ինչ կերպ է իր վերաբերմունքը դրսևորելու ընտրությունների ժամանակ: Քանի դեռ չեն պատժվել բոլոր նրանք, ովքեր իրականացրել են մարտի 1-ի ոճրագործությունը, բնականաբար դա մեր հիշողության մեջ մնալու է:
Լյուդմիլա Սարգսյանը չժխտեց, որ խմբակցության ներսում իր «կողմ» քվեարկելուց հետո կա լարվածություն. «Լարվածությունը ինձանից չէ, իրենցից է, եթե կցանկանան հաղթահարել, թող հաղթահարեն, չեն ցանկանա, ես խնդիր չունեմ»: