«Առաջին լրատվական»-ի զրուցակիցն է ԲՀԿ պատգամավոր Աբրահամ Մանուկյանը
– Պարոն Աբրահամյան, հնարավոր համարո՞ւմ եք, որ Ռոբերտ Քոչարյանը 2017-2018 թվականներին վերադառնա ակտիվ քաղաքականություն։
– Քաղաքականության մեջ ոչ մի բան չի կարելի բացառել և չի էլ կարելի հարյուր տոկոսով հաստատել։ Ամեն ինչ էլ հնարավոր է։
– Իսկ քաղաքական դաշտում կամ հանրության մոտ կա՞ սպասում, որ նա վերադառնա։
– Ես այդպիսի բան չեմ տեսել, չեմ զգացել։
– Նախկինում կարծիք կար, որ Ռոբերտ Քոչարյանի վերադարձի համար քաղաքական հենարան կարող է հանդիսանալ «Բարգավաճ Հայաստան» կուսակցությունը։
– Նախկինում էլ նման բան չի եղել։ Մենք մեր տեսակետն ենք ունեցել, մեր կուսակցությունը շարժվել է իր դիրքորոշմամբ։
– Բայց չէ՞ որ ԲՀԿ-ն տարիներ առաջ ստեղծել է Ռ. Քոչարյանը, երբ նախագահ էր։ Եվ մինչև փետրվարը՝ մինչև ԲՀԿ-ի հետ տեղի ունեցած իրադարձությունները, այդ կուսակցությունը համարվում էր երկրորդ նախագահի քաղաքական հենարանը։
– Ես չգիտեմ, եթե պարոն Քոչարյանն այդպես է համարել, այդ հարցը նրան ուղղեք։ Ես գիտեմ, որ ԲՀԿ-ն ստեղծել է պարոն Ծառուկյանը։ Եվ կուսակցությունն ինչի էլ հասել է, հասել է պարոն Ծառուկյանի հովանու ներքո։ Փետրվարից հետո դաշտը փոխվեց, հիմա կուսակցությունն իր դիրքորոշումը տարբեր հարցերի նկատմամբ իր կառուցողական մոտեցումն է ցուցաբերում։
– Այնուամենայնիվ, Ձեր կարծիքով՝ ո՞ր կուսակցությունը կարող է Ռ. Քոչարյանին ակտիվ քաղաքականություն վերադարձնել։ Այդ կուսակցությունը կարո՞ղ է լինել ԲՀԿ-ն, կամ, ինչու չէ, Հանրապետականը։ Կամ էլ միգուցե նո՞ր ուժ կստեղծվի։
– Այս պահին ես դրա պատասխանը չունեմ, որովհետև դեռ հայտնի չէ, թե Ռ. Քոչարյանն իրո՞ք գալիս է քաղաքական դաշտ։ Դեռ սա է պետք ճշտել։ Ամեն ինչ էլ կարող է։ Բայց ԲՀԿ-ն ունի իր դիրքորոշումը, և ԲՀԿ-ում նման որոշում կամ քննարկում, անգամ նման միտք չկա, որ դառնա երկրորդ կամ առաջին նախագահի կուսակցությունը։
