Դատական ակտերի հարկադիր կատարման ծառայության աշխատանքի ձեռքը վարորդները կրակն են ընկել։ Ամեն օր ԴԱՀԿ-ից վարորդներին նոր «անակնկալ» է ուղարկվում տուգանքների, հաշիվների սառեցման և այլ խնդիրների վերաբերյալ։
Օրերս էլ նոր խնդիր է ի հայտ եկել։ Վարորդներին տուգանքների վերաբերյալ ծանուցումներ են ուղարկվում, և հաշիվներից գումարներ են գանձվում ոչ իրենց կատարած խախտումների համար։ «Առավոտ ժամը 9:30, առանց քեզ զգուշացնելու հաշվիդ վրայից ԴԱՀԿ-ն 13.215 դրամ գումար է քաշում, բայց լրիվ ուրիշ ավտոների խախտումների համար, այսինքն՝ ինչ-որ մեկն իրա ավտոյի ակտը չի մուծել, բայց տույժը ինձանից են գանձել»,- Ֆեյսբուք սոցիալական ցանցում գրել է Աշոտ Ասատրյանը։
Վարորդներից մեկն էլ, ով աշխատում է ապահովագրական ընկերությունում, «Առաջին լրատվական»-ի հետ զրույցում ասաց, որ իր հետ ևս նման դեպք է տեղի ունեցել։ Ընդ որում՝ առանց ծանուցման։ «Ինձ ծանուցում չի եկել, բայց հաջորդ օրը պարզեցի, որ հաշվեհամարիցս գումար է պակասել։ Բայց երբ նայեցի մեքենայի համարանիշները, պարզվեց, որ դա ինձ հետ բացարձակապես կապ չունի, լրիվ ուրիշ մեքենայի համար էր»,- ասաց մեր զրուցակիցը։ Իսկ երբ վերջինս փորձել է ԴԱՀԿ-ից պարզաբանում ստանալ, նրան պարզաբանել են, որ հաշվեհամարից գանձված գումարը սառեցվել է, իրենք չեն կարող այն հետ վերադարձնել քաղաքացու հաշվեհամարին։ «Ասացին, որ գումարս չեն կարող հետ փոխանցել։ Իրենք կպարզեն՝ ինչ է տեղի ունեցել, ու եթե իսկապես պարզվի, որ սխալմունք է, կվերականգնեն»,- պատմեց մեր զրուցակից վարորդը։
«Բայց ինչի՞ ես մուծեմ ուրիշի խախտման համար: Ավելին, բայց ինչի՞ ես իմ ժամանակը ծախսեմ ապացուցելու համար, որ ես չեմ այս խախտումն արել: Լավ դժվար է՞ մի քիչ ուշադիր լինել»,- այսօր էլ իր ֆեյսբուքյան էջում գրել է ԿԳՆ աշխատակից Տիգրան Սահակյանը։
Ի դեպ, մեր զրուցակից վարորդները բնավ պատահականություն չեն համարում ԴԱՀԿ-ի «սխալմունքը»։ «Դե ձև է էլի, տրյուկ, ստացվեց-ստացվեց, չէ-չէ։ Շատ վարորդներ հնարավոր է ուշադիր չլինեն, հետևողական չլինեն ու տանեն վճարեն իրենց չարած խախտումների համար։ Հիմա ամբողջ քաղաքում կամերաներ են, արագաչափեր ու ոչ ոք ապահովագրված չէ խախտումներից։ Դրա համար էլ, երբ որ գա ծանուցումը, կամ հաշվեհամարից գումար գանձվի ԴԱՀԿ-ի կողմից, շատերը հետևողական չեն լինի, ու դրա արդյունքում հնարավոր կլինի կլորիկ գումար հավաքել»,- ասաց վարորդներից մեկը։
Ի դեպ նշենք, որ վերջին շրջանում խախտումների համար վճարումները հնարավոր է վճարել միայն ԴԱՀԿ շենքում՝ անկախ նրանից, որ ԴԱՀԿ-ից հավաստիացնում են, որ տուգանքները կարելի է վճարել բանկային մասնաճյուղերից ու վճարային տերմինալներից։
Առկա թերությունների ու թյուրիմացությունների հետ կապված հարցը երեկ բարձրացվեց նաև Ազգային ժողովում։ Արդարադատության նախարար Արփինե Հովհաննիսյանն ընդունեց, որ թյուրիմացություններ եղել են և հիմա էլ կան, և դա բացատրեց նրանով, որ էլեկտրոնային համակիարգում առկա են եղել խնդիրներ, տեխնիկական թերություններ, որոնք դեռ շարունակում են մնալ։ «Խնդիրները շտկվում են և մենք աշխատում ենք այնպես անել, որ քաղաքացին էլեկտրոնային եղանակով ստանա անդորագիրը, բացարձակ շփում չլինի համապատասխան ծառայողների հետ և այնուհետև ստանա իր խնդրի լուծումը»,-ասաց նախարարը՝ հավելելով, որ իրենք հիմա հանձնաժողով են ձևավորել, որտեղ ընդգրկված են տարբեր գերատեսչությունների աշխատակիցներ և աշխատանք է տարվում միասնական համակարգ ստեղծելու ուղղությամբ, որպեսզի քաղաքացիները զերծ մնան թյուրիմացություններից, ավելորդ քաշքշուկից ու ԴԱՀԿ-ում ժամերով հերթ կանգնելուց։