«Հայրենիք ու պատիվ» կուսակցության կողմից նախաձեռնված «Հակակոռուպցիոն կազմակերպությունն» ակտիվ սկսել է պայքարել Հայաստանում կոռումպացված չինովնիկների դեմ: Կազմակերպությունն, ինչպես տեղեկացրեց դրա նախագահ Գառնիկ Մարգարյանը, համագործակցում է ՌԴ-ում գործող և շուրջ 14 երկրներում ներկայացուցչություններ ունեցող «Կոռուպցիայի դեմ պայքարի համառուսաստանյան խորհրդի» հետ՝ վերջինիս փոխանցելով կոռումպացված հայ չինովնիկների մասին տեղեկություններ, փաստաթղթեր և տվյալներ, մասնավորապես նրանց մասին, ովքեր հարստահարելով ժողովրդին՝ հարստություն են կուտակել և դուրս բերել Հայաստանից:
«Մենք տեսանք, թե ինչպես 1998 թ. Ռոբերտ Քոչարյանը բռնազավթեց իշխանությունը, ինչպես 2003-ին ևս բռնազավթեց, 2004 թ. իր հրահանգով Պապլավոկում մարդասպանություն տեղի ունեցավ, 1999 թ. ՀՀ Աժ-ն և ազգի սերուցքը վերացվեց, և չորս միլիոնանոց բնակչությունից Հայաստանում կեսից քիչը մնաց կոռուպցիայի պատճառով: Իսկ մենք պայքարում ենք դրա դեմ, հակակոռուպցիոն գործընթաց ենք ծավալել: Չենք սպասում այս կամ այն արհեստական, շինծու ուժի, կառույցի աջակցությանը, մենք ընտրել ենք մեր ճանապարհը, մարդիկ իրենց կենսաթոշակի վերջին կոպեկը դնում են, ծախսում են, որովհետև ցանկանում են, որ վաղն իրենց երեխաների, թոռների առջև պարզերես լինեն: Ասում են, որ Սերժ Սարգսյանն է սա պատվիրել, Ռուսաստանն է պատվիրել, ԱՄՆ-ը, բայց դա բացառվում է: Մենք ինքնուրույն ենք սկսել և հասնելու ենք ռեժիմի կազմաքանդմանը և կոռումպացված ռեժիմի վերջին»,- նշեց Գառնիկ Մարգարյանը: Ըստ նրա՝ գործընթացը նախաձեռնվել է ՌԴ-ում գործող կազմակերպության հետ, քանի որ այն ներկայացուցչություններ ունի շատ երկրներում, ուստի համատեղ աշխատանքի շնորհիվ հնարավոր կլինի հայ ժողովրդից թալանված գումարների վրա կալանք դնել, դրանք ետ բերել ՀՀ և վերադարձնել հայ ժողովրդին:
Անդրադառնալով լրատվամիջոցներում մեծ արձագանք գտած հարցազրույցին, որը տվել էր «Կոռուպցիայի դեմ պայքարի համառուսաստանյան խորհրդի» հասարակայնության հետ կապերի պատասխանատու Մարինա Գալյուչենկոն, թե իրենց ձեռքում են լրջագույն փաստեր ՀՀ ներկայիս պետական չինովնիկների և ՀՀ երկրորդ նախագահ Ռոբերտ Քոչարյանի չարաշահումների մասին՝ մեր զրուցակիցն ասաց, որ այդ փաստաթղթերը տրամադրվել են «Հակակոռուպցիոն»-ի կողմից և կներկայացվեն ՌԴ նախագահ Վլադիմիր Պուտինին, ով երկիրը սկսել է մաքրել կոռուպցիայից: Հարցին, թե բացի Ռ. Քոչարյանից, էլ որ չինովնիկի մասին են տեղեկություններ տրամադրվել ռուսաստանյան կազմակերպությանը, Գառնիկ Մարգարյանը պատասխանեց, որ շուտով կհրապարակեն Հայաստանում կոռումպացված անձանց «սև ցուցակը»:
Նրա կարծիքով՝ ՌԴ նախագահ Վլադիմիր Պուտինն ընտրել է կոշտ ծրագիր: «Տեսնում ենք, որ չի նայում գյուղատնտեսության նախարար է, պաշտպանության նախարար է… Սա լրջագույն, բարդ գործ է: Մեկ օրում Պուտինը չի կարող իրեն մաքրել: Միանշանակ, համոզված եմ, որ եթե իր պաշտպանության նախարարին և իր շրջապատին չի խնայում, նաև Քոչարյանին չի խնայի»,- ասաց Գառնիկ Մարգարյանը: