«Ես առիթ ունեցել եմ դրա մասին խոսելու, որ քաղաքականությունը հնարավորի արվեստ է, այսինքն երկարաժամկետ կտրվածքով, ռազմավարության առումով տեսլականը մի կողմ, բայց միաժամանակ պետք է նայես մարտավարական այն բոլոր խնդիրները, որոնք երկրի համար արդյունավետ, օգտակար ու կարևոր են։ Մնում եմ համոզված նրանում, որ փոքր երկրների համար, ինչպիսին Հայաստանն է, որևէ հարցում շարժվել «այո-ոչ»-ի, «սև-սպիտակի» տրամաբանությամբ, որևէ արդյունքի չի բերելու»։ «Առաջին լրատվական»-ի հետ զրույցում, անդրադառնալով Հայաստանի՝ ԵՏՄ անդամակցությանը, ասաց ԱԺ ՀՀԿ խմբակցության նորեկ պատգամավոր Կարեն Բեքարյանը:
«Հետևաբար պետք է գործեն այլ սկզբունքներ և հնարավորության դեպքում տարբեր ինտեգրացիոն գործընթացներ, յուրաքանչյուրից իր հնարավոր օգուտներով ու արդյունավետությամբ։ Եթե այդ տեսանկյունից եք հարցին մոտենում, նույն ԵՏՄ անդամակցությունը ինձ համար ինչ-որ իմաստով դիտվում է օբյեկտիվ ու բնականոն գործընթացների դաշտում։ Իհարկե, դա չպիտի լինի ի հաշիվ եվրոպական ուղղության, որովհետև եթե մենք եվրոպական ուղղության մեջ, այն ինչ պատկերացնում ու նախատեսում ենք, չունենանք, մենք մի կողմը կապահովենք, մյուսը՝ չենք ապահովի»,-հավելեց նա։ ՛