Երիկամների անօրինական առևտուրը Հարավային Ասիայում սկսել է ծաղկել դոնորներ գտնելու գործում բրոքերների շրջանում սոցիալական մեդիայի դերի ակտիվացման շնորհիվ։ Al-Jazeera-ն անդրադարձել է աշխարհում մարդային օրգանների ամենամեծ շուկային։
26-ամյա Վիկասը (անունը փոխված է), որը բնակվում է Հնդկաստանի հյուսիսային Կանպուր քաղաքում, մեծ գումարներ է աշխատում, քանի որ Հնդկաստանի երիկամի առևտրում ներգրավված հարյուրավոր բրոքերներից մեկն է։
«Եթե գումար ունեք և շտապ է այն (երիկամը) Ձեզ անհրաժեշտ, եկեք այստեղ։ Ես Ձեզ դոնոր կգտնեմ, և Դուք մեկ ամսից տուն կվերադառնաք նոր երիկամով»,- ասել է նա Al Jazeera-ի հետ զրույցում։
Առողջապահության համաշխարհային կազմակերպության տվյալներով՝ Հարավային Ասիան առաջատար տրանսպլանտացիոն զբոսաշրջության գլոբալ հանգույց է։ Հնդկաստանը երիկամի թոփ արտահանող է։ Ամեն տարի ավելի քան 2000 հնդիկ վաճառում է իր երիկամը։ Օրգանների մեծ մասը փոխպատվաստվում են օտարերկրացիներին։
Երիկամային հիվանդությունների, դիաբետի և հիպերտոնիկ հիվանդությունների տագնապալի աճը խթանում է երիկամների համաշխարհային պահանջարկը։ Մարդկային օրգանների վաճառքի գրեթե համընդհանուր արգելքը՝ զուգորդված նույնիսկ մահից հետո երիկամի նվիրատվության հարցում շատ մշակույթներում առկա համատարած դժկամության հետ, նշանակում է, որ հիվանդները պետք է տևական ժամանակ սպասեն դոնորի։
Պահանջարկի և օրինական մատակարարումների միջև առկա վիթխարի ճեղքը լցնում է սև շուկան, որն անցնում է Հնդկաստանով, Նեպալով, Բանգլադեշով, Պակիստանով, Շրի Լանկայով և Իրանով։
Վերջին տարիներին Շրի Լանկայի մայրաքաղաք Կոլոմբոն դարձել է փոխպատվաստումների իրականացման վիթխարի կենտրոն։
