Ողջույն, ես Ֆրենկ Տուն եմ, Հայաստանում ԱՄՆ հյուպատոսը: Այս արտահերթ թողարկմամբ «Հարցրեք հյուպատոսին» հաղորդաշարը անդրադարձ կկատարի խաղարկային վիզաների ծրագրին, որը շատերին հայտնի է որպես գրին քարտի խաղարկության ծրագիր: Այն ինչ ես կասեմ այս խաղարկային ծրագրի մասին այսօր, ինչպես նաև շատ ու շատ այլ մանրամասներ կարող եք գտնել www.dvlottery.state.gov կայքում: Եթե խաղարկային ծրագիրը ձեզ հետաքրքրում է, ապա ծանոթացեք այս կայքի նյութերին:
Ամեն տարի այս ծրագրով խաղարկվում է 50.000 վիզա այն երկրների քաղաքացիների շրջանում, որոնք ունեն ԱՄՆ ներգաղթի համեմատաբար ցածր ցուցանիշներ: Վիզաները պատահական ընտրության սկզբունքով խաղարկվում են որոշակի հստակ պայմանների բավարարող և խաղարկության համար գրանցված մասնակիցների շրջանում:
Ծրագիրը իրականացվում է ԱՄՆ հարկաբյուջետային տարվա կտրվածքով՝ հոկտեմբերից մինչև սեպտեմբեր: Անցյալ հարկաբյուջետային տարում մենք այս ծրագրով Հայաստանում թողարկել ենք 1679 վիզա: Խաղարկության մասնակցության համար աշխարհով մեկ ներկայացված 14 միլիոն հայտերից 56.519-ը ստացվել էին Հայաստանի քաղաքացիներից:
2017 հարկաբյուջետային տարվա խաղարկության համար հայտերի ընդունումը մեկնարկել է ս.թ. հոկտեմբերի 1-ին ժամը 20:00-ից և կշարունակվի մինչև ս.թ. նոյեմբերի 3-ը ժամը 20:00:
Մասնակցության հայտերը ընդունվում են բացառապես էլեկտրոնային եղանակով՝ www.dvlottery.state.gov կայքում, որտեղ կան հրահանգներ անգլերենով, ինչպես նաև հայերենով: Թղթային կրիչով հայտեր չեն ընդունվում: Մասնակցության համար որևէ միջնորդավճար չի պահանջվում: Մասնակցության հայտ ներկայացնողները չպետք է նախապես գումար տան կամ ուղարկեն որևէ երրորդ կողմի, ով խոստանում է օգնել շահելու խաղարկությունում: Ուզում եմ կրկնել ու ընդգծել այս երկու բանը. գրանցումը միայն dvlottery.state.gov կայքով է իրականացվում և գրանցման վճար չկա, չի պահանջվում:
Գրանցման ավարտին դուք կստանաք եզակի նույնականացման կամ հաստատման համար: Դա շատ կարևոր է, այն ձեզ պետք է գալու մինչև 2017թ. սեպտեմբերի 30-ը: Արդեն 2016թ. մայիսի 3-ից դուք կկարողանաք այս համարի օգնությամբ http://www.dvlottery.state.gov կայքում առցանց ստուգել ձեր հայտի կարգավիճակը, այսինքն` պարզել շահել եք, թե ոչ: Այդ կայքի միջոցով է, որ շահողները կստանան հետագա հրահանգներ ներգաղթային վիզայի համար իրենց ու իրենց ընտանիքի անդամների համար դիմելու վերաբերյալ: Շահման մասին , իսկ շահելու դեպքում վիզայի համար դիմելու ու հարցազրույցի պայմանավորվածություն ձեռք բերելու միակ ճանապարհը սա է: Շատ դեպքերում միջնորդական ծառայություններ մատուցող ոչ բարեխիղճ անձինք օգնում են պատրաստել վիճակախաղի մասնակցության հայտը, չեն տրամադրում հաստատման կամ նույնականացման համարը, իսկ հետագայում գումար են պահանջում կարգավիճակի վերաբերյալ տեղեկություններ տրամադրելու համար: Այս ամենից կարելի է խուսափել, եթե հայտը ներկայացնելուց անպայմանորեն վերցնեք ձեր նույնականացման համարը: Շահող մասնակիցները շահումի մասին ծանուցում չեն ստանում էլեկտրոնային փոստով: Էլեկտրոնային փոստով այդպիսի բովանդակությամբ ստացված գրություններին պարզապես մի հավատացեք: Սովորաբար այդ գրություններով պահանջում են գումար փոխանցել կամ վճարել, որպեսզի ստանաք ձեր գրին քարտը: Դա սոսկ խաբեություն է:
Մասնակցության հայտը լրացնելիս պահանջվում է տրամադրել էլեկտրոնային փոստի հասցե: Ճիշտ կլինի տրամադրել անձնական էլեկտրոնային փոստի հասցեն, որը դուք կարող եք մշտապես ստուգել և ոչ թե որևէ այլ անձի կամ ձեր աշխատանքային էլ.փոստի հասցեն: Էլ. փոստով մենք խաղարկության մասնակիցներին ուղղակի կարող ենք հիշեցնել կարգավիճակը ստուգելու կամ վիզայի վերաբերյալ ցուցումները առցանց ստանալու մասին: Մենք էլեկտրոնային փոստով չենք ուղարկում ծանուցում շահելու մասին, հրահանգներ վճարում կատարելու կամ վիզայի դիմում ներկայացնելու վերաբերյալ և չենք տրամադրում մանրամասներ հարցազրույցի օրվա և ժամի վերաբերյալ: Այս ինֆորմացիան տրամադրվում է միայն dvlottery.state.gov կայքի միջոցով:
Օրենքի համաձայն գրանցման ընթացիկ փուլում մեկ անձի կողմից կարող է ներկայացվել միայն մեկ հայտ: Մեկից ավելի հայտերի դեպքում տվյալ մասնակիցը որակազրկվում է: Կրկնվող հայտերի բացառման համար ԱՄՆ կառավարությունը կիրառում է տարբեր ժամանակակից մեթոդներ:
Վիճակախաղում շահելը դեռ ներգաղթային վիզա ստանալու երաշխիք չէ: Շահելը նշանակում է, որ դուք իրավասու եք խաղարկային ծրագրի շրջանակում ներկայացնել ներգաղթային վիզայի դիմում:
Խաղարկային ծրագրի շրջանակում պարտադիր պահանջ է, որ հիմնական հայտատուն ունենա միջնակարգ կրթություն կամ երկու տարվա որակավորող աշխատանքի փորձ:
Այս պահանջը կիրառելի է միայն հիմնական հայտատուի նկատմամբ. նրա կինը/ամուսինը, երեխաները կարող են չբավարարել այս պահանջին: Եթե կրթական կամ աշխատանքային փորձի այս պահանջին չեք բավարարում, ապա մի շարունակեք լրացնել մասնակցության հայտը, քանի որ նույնիսկ գրանցվելուց, խաղարկությունում շահելուց և ներգաղթային վիզայի միջնորդավճարները կատարելուց հետո դուք վիզա չեք ստանա, իսկ վճարված գումարները վերադարձման ենթակա չեն: Կեղծ փաստաթղթեր, օրինակ` միջնակարգ դպրոցի կեղծ ավարտական ատեստատ ներկայացնող անձանց մասին տեղեկությունները կփոխանցվեն Հայաստանի իրավապահներին: Աշխատանքի ու կրթության վերաբերյալ այս պահանջի հետ կապված լրացուցիչ մանրամասներ կարող եք գտնել www.dvlottery.state.gov կայքում:
Կինը և ամուսինը կարո՞ղ են առանձին հայտերով մասնակցել խաղարկությանը:
Այո, ամուսինը և կինը կարող են մասնակցության առանձին հայտեր ներկայացնել, եթե մասնակցության պահանջներին բավարարում են: Եթե մեկը շահում է, ապա մյուսը համարվում է խնամքի տակ գտնվող անձ:
Խաղարկության հայտում ընտանիքի անդամներից ո՞ւմ է պետք նշել:
Պետք է նշել ամուսնուն/կնոջը (միասին չապրելը կամ միասին ԱՄՆ ներգաղթելու պլաններ չունենալը կապ չունի): Ամուսնուն/կնոջը պետք է նշել նույնիսկ այն դեպքում եթե բաժանված եք, սակայն պաշտոնապես ամուսնալուծված չեք: Եթե ամուսնալուծված եք, ապա ամուսնուն/կնոջը նշելու անհրաժեշտություն չկա, բայց անգամ եթե նշեք, որևէ խնդիր չի առաջանա: Ամուսնալուծված լինելու կամ ամուսնու/կնոջ մահացած լինելու պարագայում հայտում նրանց նշելու կարիք չկա:
Հայտում պետք է նաև թվարկել ԲՈԼՈՐ ողջ երեխաներին, ովքեր հայտը լրացնելու պահի դրությամբ ամուսնացած չեն ու մինչև 21 տարեկան են. սա վերաբերում է կենսաբանական երեխաներին, խորթ երեխաներին (նույնիսկ եթե ամուսնալուծված եք երեխայի ծնողից), ձեր ամուսնու/կնոջ երեխաներին և օրինականորեն որդեգրված երեխաներին: Նշեք հատը ներկայացնելու պահին 21 տարին չլրացած ձեր բոլոր երեխաներին, նույնիսկ եթե նրանք այլևս ձեզ հետ չեն բնակվում կամ մտադիր չեն ձեզ հետ ներգաղթել ԱՄՆ: Արդեն ԱՄՆ քաղաքացի կամ ԱՄՆ մշտական բնակչի կարգավիճակ ունեցող (գրին քարտ ունեցող) երեխաներին կարող եք չնշել, սակայն նշելու պարագայում որևէ խնդիր չի առաջանա:
Ընտանիքի անդամներին հայտում նշելը չի նշանակում, որ շահելու դեպքում նրանք պետք է պարտադիր դիմեն վիզայի համար և ձեզ հետ միասին ներգաղթեն ԱՄՆ: Սակայն եթե դուք ընտանիքի անդամին չեք նշում մասնակցության հայտում, բայց հետո նրան նշում եք վիզայի դիմումի ձևաթղթերում, ապա հարցազրույցի ժամանակ ձեր գործը որակազրկվում է և ոչ դուք, ոչ էլ ընտանիքի անդամներից որևէ մեկը վիզա չեք ստանում: Վիզայի միջնորդավճարները հետ վերադարձման ենթակա չեն: Սա վերաբերում է միայն ընտանիքի այն անդամներին, ովքեր խաղարկությանը մասնակցելու հայտը ներկայացնելիս եղել են, ոչ թե այն անդամներին, որոնցով ընտանիքը համալրվել է հայտը ներկայացնելուց հետո:
Ես արդեն այլ կատեգորիայի ներքո դիմել եմ ներգաղթային վիզայի համար: Կարո՞ղ եմ խաղարկությանը մասնակցել:
Այո, ընթացքի մեջ գտնվող ներգաղթային վիզայի գործընթացի պարագայում դուք դեռևս կարող եք մասնակցել խաղարկությանը:
Կարո՞ղ եմ խաղարկության մասնակցության հայտը ներբեռնել համակարգիչ և ավելի ուշ լրացնել այն:
Ոչ, հայտը որևէ այլ տեղ ներբեռնել ու հետո լրացնել չեք կարող: Այն հասանելի է միայն էլեկտրոնային վեբ տարբերակով: Ինֆորմացիան լրացվում և հայտը ներկայացվում է առցանց:
Կարո՞ղ եմ առցանց հիշել կիսալրացված հայտը և հետո այն ամբողջությամբ լրացնել:
Ոչ, խաղարկության մասնակցության հայտը պետք է միանգամից ամբողջությամբ լրացնել: Հայտը բացելուց հետո ձեր տրամադրության տակ դուք ունեք 60 րոպե ժամանակ այն լրացնելու ու ներկայացնելու համար: Եթե 60 րոպեի ընթացքում չեք ներկայացնում հայտը, ապա նրանում զետեղված ինֆորմացիան ջնջվում է: Կիսատ կամ մասնակի լրացված հայտերը համակարգում չեն պահպանվում, որպեսզի հետագայում դրանց հետևանքով հայտի կրկնակի ներկայացում չարձանագրվի համակարգում: Խնդրում ենք մինչ հայտի լրացմանը ձեռնամուխ լինելը կարդալ հայտի լրացման հրահանգները և նախապատրաստել անհրաժեշտ ինֆորմացիան:
Շահելու դեպքում ինչքա՞ն ժամանակ ունեմ վիզայի համար դիմում ներկայացնելու համար:
Եթե 2017թ. խաղարկությունում շահում եք, ապա ներգաղթային վիզայի դիմում կարող եք ներկայացնել 2017 հարկաբյուջետային տարվա ընթացքում, այսինքն` 2016թ. հոկտեմբերի 1-ից մինչև 2017թ. դեկտեմբերի 30-ը: Շահողներին խորհուրդ ենք տալիս շահելուց հետո հնարավորինս շուտ դիմել վիզայի համար:
Շահելու դեպքում, որտե՞ղ և ինչպե՞ս պետք է վճարեմ ներգաղթային վիզայի միջնորդավճարները:
Եթե շահել եք վիճակախաղում, ապա www.dvlottery.state.gov կայքում հայտի կարգավիճակը ստուգելիս կստանաք համապատասխան հրահանգներ վիզայի դիմումի վերաբերյալ: Դուք անձամբ կվճարեք այդ միջնորդավճարները ԱՄՆ դեսպանատանը վիզայի համար դիմելիս: Հյուպատոսական բաժնի գանձապահը ձեզ անմիջապես կտրամադրի ԱՄՆ կառավարության անդորրագիր: Ոչ մի պարագայում սովորական փոստով կամ դրամական փոխանցումների Western Union կամ այլ համակարգերի միջոցով որպես վիզայի միջնորդավճար գումարներ չուղարկեք որևէ մեկին, եթե ներգաղթային վիզայի դիմում եք ներկայացնում ԱՄՆ դեսպանատանը:
Շնորհակալություն խաղարկային վիզաների ծրագրի նկատմամբ ձեր հետաքրքրության համար: Հիշեք կայքի հասցեն՝ dvlottery.state.gov, մի մոռացեք կրթական/աշխատանքային փորձի մասով առկա պահանջները և մի թույլ տվեք, որ ձեզնից միջոցներ կորզեն:
Հաջողություն:
