Ռուսական ավիացիայի աջակցությամբ սիրիական բանակը երկրի արևմուտքում ապստամբների դեմ սկսել է ցամաքային հարձակում: Այդ մասին հոկտեմբերի 7-ին հայտնել է dpa գործակալությունը` հղում կատարելով Սիրիայում մարդու իրավունքների պաշտպանության ընդդիմադիր կազմակերպությանը:
Իրավապաշտպանների խոսքով` Համա քաղաքից հյուսիս տեղի են ունենում վերջին ամիսների ամենակատաղի մարտերը: Հարվածի են ենթարկվում նվազագույնը ապստամբ խմբերի չորս հենակետեր:
Իրավապաշտպան կազմակերպության ղեկավար Ռամի Աբդելրահմանը dpa-ին տված հարցազրույցում կարծիք է հայտնել, որ այդ գործողությունը փորձնական բնույթ է կրում` սիրիական բանակի ցամաքային խոշորագույն հարձակումից առաջ, որի նախապատրաստման մասին վերջին ժամանակներում բազմաթիվ տեղեկություններ են հայտնվել:
Սիրիական ուժայիններին մոտ գտնվող աղբյուրները հայտնել են, որ Ռուսաստանը ստուգում է իր դաշնակցի մարտական պատրաստակամությունը և ապստամբների ռեակցիան:
Այն շրջանը, որտեղ ներկայումս անցնում են մարտերը, գտնվում է ապստամբների տարբեր խմբավորումների հսկողության ներքո:
Հաղորդագրությունների համաձայն՝ «Ֆրոնտ-ան-Նուսրա» խմբավորման ծայրահեղականները տեղափոխվել են գործողությունների վայր, և Ասադի բանակին դեռևս չի հաջողվում դուրս մղել հակառակորդին: