Ինչպես արդեն տեղեկացրել ենք, իտալացի հանրահայտ մասնագետ Ֆաբիո Կապելոն ժամանել է Երևան, ծանոթացել «Բանանց» ֆուտբոլային ակումբի ենթակառուցվածքներին։
Ակումբն ընտրողական ու գռեհիկ վերաբերմունք է ցուցաբերել՝ Կապելոյի հետ հանդիպմանը հրավիրելով 3-4 լրատվամիջոցի։ Կապելոն պատասխանել է միայն հրավիրված լրատվամիջոցների ներկայացուցիչների հարցերին։ «Բանանց» ֆուտբոլային ակումբը ներկայացրել է պարզաբանում։
«ԶԼՄ-ների հարգելի ներկայացուցիչներ, «Բանանց» ֆուտբոլային ակումբը ցանկանում է ներողություն խնդրել բոլոր այն լրատվամիջոցներից, որոնք տեղեկացված չեն եղել իտալացի մասնագետ Ֆաբիո Կապելլոյի այցի մասին: Այցը տեղի է ունեցել անակնկալ և հանպատրաստից կերպով:
Հանդիպմանն արագորեն հրավիրվել ընդամենը մի քանի զուտ մարզական և ֆուտբոլային լրատվամիջոցների ներկայացուցիչներ, ովքեր մշտապես հետաքրքրություն են ցուցաբերել «Բանանցի» նկատմամբ:
Բոլոր մյուս լրատվամիջոցներից, որոնք արժանիորեն պետք է հրավեր ունենային այս փոքրիկ հանդիպմանը կամ չունենային, ներողություն ենք խնդրում բացթողման համար: Բոլոր լրատվամիջոցները կարող են ազատորեն օգտվել մեր կայքում տեղադրված ֆոտո, վիդեո և տեքստային նյութերից»: