Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արթուր Ստեփանյանի նախագահությամբ տեղի ունեցավ ՀՀ ոստիկանությունն ընդդեմ «SOS»-ի քաղաքացիական գործով հերթական նախապատրաստական նիստը:
ՀՀ ոստիկանությունը, ինչպես նաև կոնկրետ ոստիկաններ Արթուր Մադաթյանը և Սերգեյ Զաքարյանը հայց են ներկայացրել YouTube-ով հեռարձակվող «SOS» հաղորդաշարի հաղորդավար Վիլեն Գայֆեջյանի դեմ՝ պատիվն ու արժանապատվությունը արատավորող, գործարար համբավը վնասող հրապարակային հաղորդում հեռարձակելու համար:
2015 թվականի մայիսի 24-ին, ժամը 22-ն անց 20-ին YouTube-ով «SOS»-ը հեռարձակել է «G/7» վերնագրով 11-րդ թողարկումը, որի ժամանակ, ըստ հայցվորների, հաղորդավարի կողմից հնչեցվել են վիրավորական արտահայտություններ ոստիկանության ծառայողների և մասնավորապես Արթուր Մադաթյանի և Սերգեյ Զաքարյանի հասցեին:
Դատական նիստին պատշաճ ծանուցվել, բայց չէր ներկայացել պատասխանող կողմը՝ Վիլեն Գայֆեջյանը, նրա ներկայացուցիչները: Դատարանի մոտ չէին հավաքվել նաև այս գործով հետաքրքրվողները: Սպասվող աժիոտաժը չկար:
Դատարանը, լսելով կողմերին, որոշեց դատական նախապատրաստական նիստն անցկացնել պատշաճ ծանուցված, բայց չներկայացած պատասխանողի բացակայությամբ:
Նախորդ նիստը հետաձգվել էր պատասխանող Գայֆեջյանի ներկայացուցիչ Հայկուհի Հարությունյանի միջնորդությամբ, ով ժամանակ էր խնդրել՝ գործի նյութերին ծանոթանալու համար:
Նախորդ նիստին դատարանը պատասխանողի ներկայացուցիչ չէր ճանաչել իրավապաշտպան Արտակ Զեյնալյանին, քանի որ օրենքով որպես կողմի ներկայացուցիչ կարող է հանդես գալ միայն փաստաբանը, իսկ Զեյնալյանն իրավաբան է, բայց փաստաբան չէ:
Օրենքի այս դրույթի հակասահամանադրականությունը պատասխանող կողմի ներկայացուցիչները մտադիր են վիճարկել Սահմանադրական դատարանում:
Այս նիստին դատարանը հրապարակեց պատասխանող կողմի միջնորդությունը, որով խնդրվում էր գործի քննությունը կասեցնել՝ մինչև վերը հիշատակված հարցով Սահմանադրական դատարանը որոշում կայացնի:
Հայցվոր կողմի ներկայացուցիչները՝ Հովհաննես Քոչարյանը, Կարեն Քալանթարյանը նշեցին, որ պատասխանող կողմի միջնորդությունը պետք է մերժվի, քանի որ օրենքի պահանջով՝ գործի քննությունը դատարանը պարտավոր է կասեցնել երկու դեպքում՝ եթե գործի քննությունը շարունակելու հարցում կա անհնարինություն կամ եթե տվյալ գործի հետ կապված՝ Սահմանադրական դատարանում արդեն իսկ քննվող գործ կա:
Տվյալ դեպքում գործի քննությունը շարունակելու անհնարինություն չկա, բացի այդ՝ պատասխանող կողմը չի ներկայացրել ապացույց, որ Սահմանադրական դատարանում այս գործի հետ կապված՝ գործ է քննվում: Այն խնդիրը, որով պատասխանողի ներկայացուցիչները կարող են դիմել Սահմանադրական դատարան, կոնկրետ այս գործի փաստական հանգամանքների հետ կապված չէ:
Հայցվոր կողմը նշեց, որ պատասխանող կողմի միջնորդության մեջ նշված հանգամանքները գործի քննությունը կասեցնելու հիմք չեն:
Դատարանը, լսելով կողմի կարծիքը, մերժեց պատասխանող կողմի միջնորդությունը, գործի քննությունը չկասեցվեց:
Ոստիկաններ Մադաթյանի և Զաքարյանի ներկայացուցիչ, փաստաբան Կարեն Քալանթարյանը ներկայացրեց իրենց հայցի պահանջը՝ պատասխանողը պետք է հրապարակավ ներողություն խնդրի հայցվորներից և որպես փոխհատուցում՝ յուրաքանչյուրին վճարի նվազագույն աշխատավարձի 1000-ապատիկի չափով՝ 1 միլիոն դրամ փոխհատուցում:
Դատավորի հարցին՝ դրամական փոխհատուցումը պնդելո՞ւ են հայցվորները, փաստաբանը պատասխանեց՝ այո, քանի որ մինչև այժմ պատասխանող կողմը դեռ դիրքորոշում չի էլ հայտնել:
Հայցվորների ներկայացուցիչը նշեց, որ վերոհիշյալ հաղորդման ժամանակ ցուցադրվել են ոստիկանության ծառայողների պատկերներ, այդ թվում՝ հայցվորներ Մադաթյանի և Զաքարյանի պատկերները, ովքեր գտնվել են ծառայության մեջ:
Հովհաննես Քոչարյանը ներկայացրեց «SOS»-ի հիշյալ հաղորդման տեքստը՝ «արդեն 22 485 մարդ իմացավ, որ պայքարելու է լույսի թանկացման դեմ: Այդքան մարդ էլ իմացավ, թե ինչ է իրենից ներկայացնում հայ ոստիկանը…»:
Հովհաննես Քոչարյանը նշեց, որ հաղորդման հեղինակը վիրավորական բնույթի արտահայտություններ է արել ամբողջ ոստիկանության բոլոր ծառայողների հասցեին, վնասել է ոստիկանության հեղինակությունն ու բարի համբավը: Կողմը պնդելու է իր ներկայացրած հայցը՝ հրապարակավ ներողություն խնդրելու վերաբերյալ:
Դատարանը հրապարակեց նաև պատասխանող կողմի ներկայացրած առարկությունը՝ հայցերի վերաբերյալ: Կողմը նշել էր, թե հայցերը ներկայացված են ամբողջությամբ իրականությունը աղավաղող մեկնաբանություններով:
Այս գործով հաջորդ դատական նիստը տեղի կունենա նոյեմբերի 27-ին:
