Ադրբեջանական Turan լրատվական գործակալության փոխանցմամբ՝ Եվրոպայի խորհուրդը լքում է մարդու իրավունքների հարցով Ադրբեջանի հետ համատեղ աշխատանքային խումբը։ Այս մասին հայտարարել է Եվրոպայի խորհրդի գլխավոր քարտուղարի մամլո քարտուղարը։
Վերջինիս հաղորդմամբ՝ Եվրոպայի խորհրդի գլխավոր քարտուղար Թյորբորն Յագլանդը հոկտեմբերի 7-ին Նախարարների կոմիտեին իրազեկել է Ադրբեջանում մարդու իրավունքների հարցերով համատեղ աշխատանքային խմբին Եվրոպայի խորհրդի մասնակցությունը դադարեցնելու իր որոշման մասին։
Ընդգծվում է, որ Ադրբեջանում իրավապաշտպանների հետ կապված ընդհանուր իրավիճակը դրամատիկ ձևով վատթարացել է,աճում է կալանավորված իրավապաշտպանների թիվը, իսկ Եվրոպայի խորհուրդը մտահոգիչ տեղեկություններ է ստանում նրանց պահպանման անընդունելի պայմանների մասին։
Դրա հետ կապված՝ Յագլանդն իր որոշման մասին իրազեկել է Ադրբեջանի նախագահ Իլհամ Ալիևին։
