ԱԺ նախագահ Գալուստ Սահակյանն անդրադառնալով Սերժ Սարգսյանի այն հայտարարությանը, որ ինքն ունի Հայաստանի հաջորդ առաջնորդի իր թեկնածուն, սակայն չի տա նրա անունը նրա կյանքը «դժոխքի չվերածելու համար», ասել է, որ ինքն էլ կարող է ասել, թե իր մտքում էլ կա, բայց իր մտքում եղածն իր սեփականությունն է: Սերժ Սարգսյանը, ինչպես հայտնի է, իր թեկնածուն կամ կանխատեսումն ունենալու մասին հայտարարել էր ԱՄՆ-ում «Քարնեգի» կենտրոնի փորձագետների հետ փակ հանդիպմանը:
Գալուստ Սահակյանի արձագանքն այդ հայտարարությանը շատ հետաքրքրական է՝ հատկապես այն տեղեկությունների ֆոնին, որ Սերժ Սարգսյանի հայտարարությունն իրարանցում է առաջացրել իշխանական համակարգում: Իհարկե, կառաջացնի, քանի որ Սերժ Սարգսյանի հայտարարությունը ըստ էության ակնարկ է ինչ-որ գաղտնի պլանների մասին, որ ունի միայն ինքը և որով չի կիսվում ու չի պատրաստվում կիսվել ՀՀԿ-ի հետ:
Եվ ահա ի դեմս Գալուստ Սահակյանի՝ ըստ էության, հնչում է ՀՀԿ-ի պատասխանը Սերժ Սարգսյանին, որ եթե նա ունի, այսպես ասած, բոլորից գաղտնի իր թեկնածուն ու չի ուզում իր պլաններով կիսվել ՀՀԿ-ի հետ, ապա ՀՀԿ-ն էլ իր մտքում ունի անուններ: Այսինքն՝ Գալուստ Սահակյանի շուրթերով իշխող համակարգի տրամադրություններն են խոսում, որոնք Սերժ Սարգսյանին ակնարկում են, որ կամ նա իր թեկնածուին, իր մտքում եղած անունը կհամաձայնեցնի, կքննարկի ՀՀԿ-ական կոնգլոմերատի հետ և կստանա հավանություն, կամ էլ ի պատասխան իր մտքում եղած անունների՝ կստանա իշխանական համակարգի տարբեր մտքերում կամ, այսպես ասած, ՀՀԿ-ի հավաքական մտքում եղած որևէ անուն, ու այդ ժամանակ կտեսնեն, թե ում «միտքը» իրականություն կդառնա:
Մեծ հաշվով՝ Գալուստ Սահակյանի հայտարարությունը նախազգուշացում կամ սպառնալիք է Սերժ Սարգսյանին, որ ՀՀԿ-ի հետ, այսպես ասած, «մտքերով» չխոսի: Եվ հետաքրքրականը այն է, որ այդ սպառնալիքը կամ զգուշացումը Սահակյանը հնչեցնում է Ռոբերտ Քոչարյանի հարցազրույցի ֆոնին, ընդ որում՝ չբացառելով, որ Քոչարյանը երբևէ կարող է լինել ՀՀԿ-ի սատարումը վայելող թեկնածու:
Սերժ Սարգսյանը կորոշի՝ ՀՀԿ-ին որևէ հրապարակայի՞ն պատասխան տալ, թե՞ կգերադասի խոսել ՀՀԿ գործկոմի այս շաբաթ կայանալիք հերթական նիստում: Ակնհայտ է երևի թե, որ նիստում կլինի իսկապես թեժ խոսակցություն: Բայց Սերժ Սարգսյանը երևի թե կփորձի հասկանալ ոչ թե այն, ինչ կա Գալուստ Սահակյանի մտքում, գործնականում դա հասկանալը իսկապես կարող է շատ բարդ և գուցե նույնիսկ անհնար լինել, այլ կփորձի պարզել մյուս ՀՀԿ-ականների մտքում եղած անունները:
Միաժամանակ, իհարկե, պետք չէ բացառել, որ Սերժ Սարգսյանն ու ՀՀԿ-ականները միմյանց համար բացահայտեն բոլորովին կեղծ, այսպես ասած՝ շեղող անուններ:
