«Հանրապետական կուսակցությունը Ռոբերտ Քոչարյանին սատարող ուժ է եղել, և ես կցանկանայի, որ ավելի բարձր արժևորումներով քաղաքական գնահատականների ճանապարհով գնանք»,- այսօր լրագրողների հետ զրույցում ասաց ԱԺ նախագահ Գալուստ Սահակյանը՝ անդրադառնալով սահմանադրական փոփոխությունների վերաբերյալ Ռոբերտ Քոչարյանի՝ նախօրեին հնչեցրած քննադատությանը։
ՀՀԿ-ն, ինչպես նախկինում, հնարավոր համարո՞ւմ է 2018թ. նախագահական ընտրություններին նույնպես առաջադրել Ռ. Քոչարյանի թեկնածությունը։ «Քոչարյանը մեր կուսակցության ներկայացուցիչը չէ, և 2017-2018 թվականները դեռևս բավականին հեռու են, և պատշաճ չէ նման հարց քննարկել։ Ես չեմ կարծում, որ այս պահին ՀՀԿ-ն թեկնածուների որոնման մեջ է, ՀՀԿ-ն շատ թեկնածուներ ունի»,- պատասխանեց Գ. Սահակյանը։
Բայց եթե Ռ. Քոչարյանն, այնուամենայնիվ, որոշի անձամբ մտնել ակտիվ քաղաքականություն, հնարավո՞ր է առաջիկա համապետական ընտրություններին նույնպես իրավիճակը սրվի այնպես, ինչպես տեղի ունեցավ 2008թ. նախագահական ընտրությունների դեպքում։ «Ես խնդրում եմ, երկրորդ, ինչպես նաև առաջին նախագահին հասարակության մեջ բոբոներ մի դարձրեք։ Նրանք իրենց արժանիքներն ունեն և գտնվում են բոլորի տեսադաշտում։ Ես չեմ կարծում, որ թե առաջին, թե երկրորդ նախագահը գնում են այն ճանապարհով, որ այդպիսի լարվածություն ստեղծեն և մեր ժողովրդին վնաս պատճառեն»,- եզրափակեց Գ. Սահակյանը։