Վիետնամում ՀՀ դեսպան Ռաիսա Վարդանյանը հոկտեմբերի 6-ին հանդիպել է Ֆրանկոֆոնիայի միջազգային կազմակերպության Ասիա-խաղաղօվկիանոսյան տարածաշրջանի նորանշանակ ներկայացուցիչ Էրիկ-Նորմանդ Թիբոլթի հետ։
Ինչպես տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, հանդիպման ընթացքում դեսպան Վարդանյանը զրուցակցին համառոտ ներկայացրել է Վիետնամում ՀՀ դեսպանության գործունեությունը, հայ-վիետնամական հարաբերությունների ներկա օրակարգը և առաջիկայում իրականացվելիք մշակութային ծրագրերը։
Կողմերը երկուստեք ընդգծել են ընթացիկ տարվա հոկտեմբերի 10-ից 11-ը Երևանում կայանալիք Ֆրանկոֆոնիայի միջազգային կազմակերպության արտգործնախարարների համաժողովի 31-րդ նստաշրջանի կարևորությունը և վստահություն հայտնել, որ համաժողովը նոր մակարդակի վրա կբարձրացնի անդամ երկրների միջև հարաբերությունները և կամրապնդի փոխգործակցությունը։
Դեսպան Վարդանյանը նշել է, որ Հայաստանի համար մեծ պատիվ է հյուրընկալել նման հեղինակավոր ներկայացուցչական համաժողով, և որ հայկական կողմն անում է առավելագույնը` այն բարձր մակարդակով անցկացնելու համար։
Էրիկ-Նորմանդ Թիբոլթն իր հերթին նշել է, որ Հայաստանը, լինելով Ֆրանկոֆոնիայի միջազգային կազմակերպության ամենաակտիվ անդամներից, մեծապես նպաստում է կազմակեպության նպատակների իրականացմանը։
Կողմերը քննարկել են Հանոյում համատեղ մշակութային ծրագրերի իրականացման հնարավորությունները։