Էլեկտրաէներգիայի թանկացման դեմ պայքարող «Ոչ թալանին» քաղաքացիական նախաձեռնության անդամ Մաքսիմ Սարգսյանը «Առաջին լրատվական»-ի հետ զրույցում, խոսելով իրենց նախաձեռնության պայքարի մասին, ասաց՝ այս պահին փորձում են հասկանալ, թե ՀԷՑ-ի հետ կապված գործընթացը ուր է տանում և որտեղ են պատրաստվում ժողովրդին «քցել»:
Մաքսիմ Սարգսյանի խոսքով՝ ի սկզբանե իրենց պայքարը ինչ-որ բանով քաղաքական է եղել. «Այնքանով, որքանով պահանջը ուղղված է եղել քաղաքական գործիչներին, այդքանով մեր պայքարը քաղաքական է եղել»:
Խոսելով ՀԷՑ-ի վաճառքի և «Տաշիր գրուպ»-ի սեփականատեր Սամվել Կարապետյանի հնարավոր քաղաքական նպատակների մասին, Մաքսիմ Սարգսյանն ասաց. «ՀԷՑ-ում հարկավոր է վերահսկողություն, որպեսզի չլինեն թալանն ու մսխումները: Եթե հիմա էլ գնորդն ինչպես ուզենա, այդպես վարվի, շքեղություններ թույլ տա, բնականաբար մի տարի հետո կրկին թանկացնելու են սակագինը: Այս պրոցեսն ի սկզբանե կազմակերպված էր: ՀԷՑ-ը գրանցեցին օֆշորային ընկերությունում, որպեսզի հետո ավելի էժան գնով վերավաճառեին Սամվել Կարապետյանին: Ինքն էլ եկավ, «բարի ձյաձյայի» համբավ է թողնում, որ կսուբսիդավորի ավելացված սակագինը: Բայց ժողովրդին սուբսիդավորում պետք չէ, այլ պետք է խելամիտ սակագին: Խնամի-բարեկամ հարաբերությունները շատ հնարվոր է, որ ավելի վատացնեն իրավիճակը ՀԷՑ-ում»:
Նախաձեռնության անդամ Մ. Սարգսյանը նշեց, որ Հայաստանում քաղաքական և բիզնես ոլորտը սերտաճած է և բնականաբար այս գործարքի մեջ քաղաքական երանգներ կան: Նա հավելեց, որ հոսանքի թանկացումը հիմնավորված չէ, ինչպես ասում է վարչապետ Հովիկ Աբրահամյանը: Առաջիկայում նախաձեռնությունը հստակ որոշումներ կընդունի իրենց հետագա քայլերի վերաբերյալ: