«Առաջին լրատվական»-ի զրուցակիցն է Սահմանադրական փոփոխությունների մասնագիտական հանձնաժողովի անդամ Վարդան Պողոսյանը:
– Պարոն Պողոսյան, այսօր հրապարակվել է Ռոբերտ Քոչարյանի հարցազրույցը, որում նա բավական խիստ գնահատականներ է տվել այս նախագծին, մասնավորապես ասել է, որ սա տանում է կուսակցապետության և կուսակցապետի միջոցով՝ բռնապետության: Այսինքն՝ բավական խիստ գնահատականներ է հնչեցրել Ձեր հեղինակած նախագծի վերաբերյալ:
– Նախագծի համար ես կարող եմ պատասխանատվություն կրել և զգում եմ պատասխանատվությունը, բայց կուզեի ճշգրտել, որ դա իմ նախագիծը չէ՝ չնայած կիսում եմ այդ նախագծի բոլոր սկզբունքային դրույթները: Քանի որ իսկապես տեղյակ չեմ պարոն Քոչարյանի հարցադրումներին, կարող եմ միայն ձեր ասածի հիման վրա այժմ ասել, որ Սահմանադրության փոփոխությունների նախագիծը ամենաժողովրդավարական գաղափարներն է ամրագրել, այս նախագծից դիկտատուրայի հոտ ընդհանրապես չի փչում, դիկտատուրայի վտանգը կար գործող Սահմանադրության պայմաններում, և դրա վտանգը մեղմվում կամ շատ մեծ չափով սահմանափակվում է մեր առաջարկած նախագծում, որովհետև այդ նախագիծը ենթադրում է, որ այլևս չի լինելու իշխանության գերկենտրոնացում որևէ մեկ անձի ձեռքում, և քաղաքական պատասխանատվություն կրողները միշտ կարող են փոխվել Ազգային ժողովի կողմից:
– Ռոբերտ Քոչարյանն ասել է, որ ընդհակառակը՝ տանում է քաղաքական մենաշնորհի և կոմունիստական հասարակարգի, և սա միայն իր տեսակետը չէ:
– Ես բացարձակապես չեմ կիսում այդ գնահատականները և կոմունիստական սահմանադրությունների հետ համեմատելը բացարձակապես անտեղի եմ համարում, և նաև երևի արդյունք այն բանի, որ չեն կարողանում իրարից տարբերել տարբեր սահմանադրությունների տրամաբանությունն ու բովանդակությունը:
– Այնուամենայնիվ, ի՞նչ եք կարծում՝ Քոչարյանի այս հայտարարությունը ի՞նչ ազդեցություն կունենա «Ոչ»-ի ճակատի պայքարի վրա, և հնարավոր համարո՞ւմ եք սահմանադրական փոփոխությունների տապալումը այս փուլից հետո:
– Չեմ կարծում, որ Քոչարյանի ասածը որևէ ազդեցություն է ունենալու այս գործընթացի վրա: Նա 10 տարի չի եղել քաղաքական թատերաբեմում, նրա գնահատականները ես դիտարկում եմ որպես մասնավոր անձի ասած կամ կատարած հայտարարություններ:
– Դուք նախագծի այս վերջին տարբերակի վերաբերյալ այսպիսի ձևակերպում եք տվել. «Նախագահի համար ընդունելի սահմանադրական նախագիծ»:
– Ես նման պնդումներ չեմ անում, որ դա նախագահի համար ընդունելի է կամ ընդունելի չէ, այդ արտահայտությունը կա կանոնակարգում: Եկեք մի բան շատ պարզ հասկանանք. սահմանադրական փոփոխություններն առաջարկվել են ՀՀ նախագահի կողմից, և ցանկացած փոփոխություն այդ նախագծում, որոնք որ կատարվել են պատգամավորների առաջարկությամբ, բնականաբար՝ բոլորին ՀՀ նախագահը ծանոթացել է և արտահայտել է իր տեսակետը՝ ընդունելու կամ չընդունելու տեսանկյունից: Եվ դրա համար բացարձակապես անտեղի է շահարկել «հանրապետության նախագահի համար ընդունելի» արտահայտությունը: Դա օրենքի պահանջն է, Սահմանադրության պահանջն է:
– Ո՞ր օրենքի: Ինչո՞ւ նախնական տարբերակում նման ձևակերպում չկար:
– Նախնական տարբերակում խոսքը սահմանադրական փոփոխությունների նախագծի մասին էր, որ ներկայացրել էր ո՞վ՝ հանրապետության նախագահը: Դրանից հետո կանոնակարգ օրենքը նախատեսում է, որ ԱԺ քննարկումների ընթացքում կարող են լինել առաջարկներ, և եթե այդ առաջարկները ընդունելի են հանրապետության նախագահի համար, այդ դեպքում դրանք կարող են ընդգրկվել Սահմանադրության փոփոխությունների նախագծում: Եվ հենց այդպես էլ տեղի է ունեցել:
