Երևան քաղաքի ավագանին Մարգարյան փողոցի հ. 45 շենքում բնակարաններ կտրամադրի երգիչներ Բերջ Քարազյանին, Դավիթ Ամալյանին, հաղորդավար Զառա Արամյանին ու գրող Վահրամ Սահակյանին: Այս որոշումներն ընդգրկված են ավագանու հոկտեմբերի 8-ի արտահերթ նիստի օրակարգում:
Բացի այդ, ավագանին կքննարկի «Երևանի պատվավոր քաղաքացի» կոչումը շնորհելու և նոր բնակարաններ տրամադրելու հարցերը: Ղեկավարվելով «Երևան քաղաքում տեղական ինքնակառավարման մասին» Հայաստանի Հանրապետության օրենքի 12-րդ հոդվածի 1-ին մասի 35-րդ կետի դրույթներով և հիմք ընդունելով Երևանի քաղաքապետի առաջարկությունը, կքննարկվի Երվանդ Երզնկյանին, Արթուր Աբրահամին, Ռաիսա Մկրտչյանին, Ռուբեն Մաթևոսյանին «Երևանի պատվավոր քաղաքացի» կոչումը շնորհելու հարցը:
Կոմպոզիտոր, դիրիժոր, ՀՀ արվեստի վաստակավոր գործիչ, ՀՀ ժողովրդական արտիստ, Հայաստանի հանրային ռադիոյի սիմֆոնիկ նվագախմբի գլխավոր դիրիժոր և գեղարվեստական ղեկավար Երվանդ Երզնկյանին կոչումը կշնորհվի Երևան քաղաքի 2797-րդ տարեդարձի առթիվ, ստեղծագործական ակնառու հաջողությունների, Երևան քաղաքի երաժշտաարվեստում ներդրած նշանակալի ավանդի և բազմամյա վաստակի համար:
Պրոֆեսիոնալ բռնցքամարտիկ, աշխարհի բազմակի չեմպիոն Արթուր Աբրահամին (Ավետիք Գրիգորի Աբրահամյան) կոչումը կշնորհվի Երևան քաղաքի 2797-րդ տարեդարձի առթիվ, սպորտի զարգացման գործում ներդրած նշանակալի ավանդի և միջազգային մրցասպարեզներում ունեցած ակնառու հաջողությունների համար:
Երգչուհի, ՀՀ ժողովրդական արտիստ Ռաիսա Հրանտի Մկրտչյանին «Երևանի պատվավոր քաղաքացի» կոչում կշնորհվի Երևան քաղաքի 2797-րդ տարեդարձի առթիվ, ստեղծագործական ակնառու հաջողությունների, Երևան քաղաքի երաժշտարվեստում ներդրած նշանակալի ավանդի և բազմամյա վաստակի համար:
Նման կոչում կարող է շնորհվել նաև երգիչ, ՀԽՍՀ ժողովրդական արտիստ Ռուբեն Մաթևոսյանին`Երևան քաղաքի 2797-րդ տարեդարձի առթիվ, ստեղծագործական ակնառու հաջողությունների, Երևան քաղաքի երաժշտարվեստում ներդրած նշանակալի ավանդի և բազմամյա վաստակի համար: