ԱՄՆ և ԵՄ օգտատերերի միջև անձնական տվյալների անարգել փոխանակման համակարգն անվավեր է ճանաչվել՝ հայտնում է korrespondent.net-ը: Հոկտեմբերի 6-ին այսպիսի վճիռ է կայացրել Եվրոպական դատարանը Լյուքսեմբուրգում ավստրիացի ուսանող Մաքսիմիլիան Շրեմսի հայցի գործով:
Դատարանի վճռով՝ անվավեր է համարվել ԱՄՆ-ի և Եվրահանձնաժողովի միջև Safe Harbor հատուկ համաձայնությունը, որն ամերիկյան կոնցեռններին հնարավորություն էր տալիս առանց խոչընդոտի անձնական տեղեկություն փոխանակել ԵՄ երկրների հետ:
Ավստրիայի բնակիչ Մաքսիմիլիան Շրեմսը դատի է տվել Facebook-ի ղեկավարությանը՝ նրան մեղադրելով անձնական տվյալների պաշտպանության պահանջները խախտելու մեջ: Հայցը նախաձեռնվել է ԿՀՎ նախկին գործակալ Էդվարդ Սնոուդենի բացահայտումներից հետո:
Բացի դրանից՝ Շրեմսը նախաձեռնել է հավաքական հայց Facebook-ի դեմ, որը տրվել է Վիեննայի դատարան: Մոտ 25 000 հայցվորներ, մեծ մասը՝ ԵՄ-ից, ընկերությանը մեղադրել են, մասնավորապես, անձնական տվյալների պաշտպանության մասին ԵՄ օրենսդրությունը խախտելու մեջ: Նրանք Facebook-ից պահանջել են սիմվոլիկ փոխհատուցում՝ 500-ական եվրո յուրաքանչյուրին: Դատարանը մերժել է հայցը, այնուհետև Շրեմսը բողոքարկել է վճիռը: