Ազգային ժողովի փոխնախագահ, ՀՀԿ խմբակցության պատգամավոր Էդուարդ Շարմազանովն այսօր Ազգային ժողովում լրագրողների հետ զրույցում անդրադարձել է սահմանադրական փոփոխությունների վերաբերյալ Ռոբերտ Քոչարյանի հարցազրույցին:
Էդուարդ Շարմազանովը մամուլի ասուլիսի ընթացքում անդրադարձավ երկրորդ նախագահի՝ Ռոբերտ Քոչարյանի հարցազրույցին՝ համեմատելով Վենետիկի հանձնաժողովի եզրակացության հետ:
«Վենետիկի հանձնաժողովի եզրակացության մեջ, ի տարբերություն երկրորդ նախագահի մեկ հարցանոց հարցազրույցի, չկային վերամբարձ բառեր, կար գնահատական, կար միջազգային փորձ, տեսլական, և բարձր է գնահատված հանձնաժողովի կատարած աշխատանքը:
ՀՀ երկրորդ նախագահի հարցազրույցում կային և գերակշռող էին ոսկեղենիկ հայերենով գրված վերամբարձ արտահայտություններ: Չարիք, լճացման աղբյուր, վերարտադրման համակարգ՝ նմանատիպ գնահատականներ էին հնչեցվում, բայց այնուամենայնիվ, հստակ երևում էր հարցազրույցի անկյունաքարը. «Այս սահմանադրությունը պետք չի փոխել, որովհետև նոր սահմանադրությունը դառնում է արատավոր համակարգի վերարտադրման գործիք»: Հարցեր ունեմ՝ այս արատավոր համակարգը ե՞րբ է առաջացել, ինչպիսի՞ պայմաններում, եթե իրոք համակարգը արատավոր է, ապա ոչինչ չփոխելով՝ ինչպե՞ս պետք է պայքարենք այդ արատավոր համակարգի վերարտադրման դեմ:
Մյուս կողմից հասկանալի են հարգարժան երկրորդ նախագահի գնահատականների օբյեկտիվ հիմքերը, որովհետև լիովին մարդկային է, երբ մարդը դժվար է հրաժարվում մի բանից, որի ստեղծողն ինքն է եղել:
Աշխարհը արագ է փոխվում, կյանքը արագ է փոխվում, և տեղում դոփելը անթույլատրելի է: Ես իմ երկրի համար ցանկանում եմ ոչ թե տեղում դոփել, այլ շարժվել առաջ:
