Արարատի մարզի Մասիս քաղաքում այսօր տեղի ունեցավ Ս. Թադևոս եկեղեցու օծման արարողությունը։ Եկեղեցին կառուցվել է «Գրանտ հոլդինգի» սեփականատեր Վարդանյանների հովանավորությամբ։
Մինչ պատարագը կսկսվեր, Մասիսի բնակիչները հավաքվել էին հարակից այգում։ Նրանց համար եկեղեցի մուտքն արգելված էր, քանի որ եկեղեցում սպասում էին բարձաստիճան պաշտոնյաների՝ Սերժ Սարգսյանի գլխավորությամբ։
Ժողովուրդը մոտ 1.5-2 ժամ ոտքի վրա սպասեց, մինչև պաշտոնյաները ունկնդրեցին եկեղեցու օծման պատարագը՝ ամենայն հայոց կաթողիկոսի ձեռամբ, որին հաջորդեց բանկետը եկեղեցու բակում։
Այդ ընթացքում եկեղեցու հարակից վայրում ժողովրդին բաժանել էին մատաղը՝ թերևս պաշտոնյաների աչքից հեռու։
Ուշագրավն այն է, որ Վարդանյանների հովանավորությամբ կառուցված եկեղեցու օծման արարողությանը քաղաքական ուժերից ներկա էին միայն Հանրապետականն ու Դաշնակցությունը՝ իր ղեկավար կազմով։ Այդ թվում՝ ՀՅԴ բյուրոյի անդամ Հրանտ Մարգարյանը, պատգամավոր Արծվիկ Մինասյանը, ԳՄ անդամ Արմեն Ռուստամյանը, Աղվան Վարդանյանը և այլն։ Ներկա էր նաև նախկին ՀՅԴ-ական, այժմ ՀՀԿ շարքերը համալրած Արայիկ Գրիգորյանը։
Հանրապետականի հետ մոտալուտ կոալիցիայի հեռանկարի առթիվ մեր հարցին ՀՅԴ բյուրոյի անդամ Հրանտ Մարգարյանը հրաժարվեց պատասխանել՝ ասելով, թե «7 տարի է՝ խոսում են կոալիցիայի մասին, բայց նման բան չկա»։
Հյուրերի թվում էր նաև վերջերս որպես գործարար Սերժ Սարգսյանից շքանշան ստացած ՀՀԿ խմբակցության պատգամավոր Սամվել Ալեքսանյանը, որը, սակայն, հրաժարվեց պատասխանել գործարար լինել-չլինելու և շքանշան ստանալու առթիվ մեր հարցին։
Վարդանյան եղբայրները, ովքեր ուղեկցում էին Սերժ Սարգսյանին, հրաժարվեցին հարցերի պատասխանել։ Եկեղեցու ճարտարապետ Անահիտ Թարխանյանը լրագրողներին ասաց, որ կառույցի ձևն ընտրել է Վազգեն վեհափառը, սակայն երկար ժամանակ հնարավոր չէր լինում կառույցն ավարտին հասցնել։
Երբ պաշտոնյաները գնացին, եկեղեցու բակի դարպասները վերջապես բացվեցին դրա իրական հաճախորդների՝ Մասիսի բնակչության համար։
Մանրամասները դիտեք տեսանյութում։