Ընդդիմադիր ԲՀԿ-ն, որը մինչ փետրվարյան հայտնի իրադարձությունները խիստ դեմ էր սահմանադրական փոփոխությունների գործընթացին և համարում էր, որ դրանք իշխանության վերարտադրման համար են արվում, ոչ միայն օրեր առաջ պաշտոնապես հայտարարեց, որ կողմ է փոփոխություններին, այլ նաև, որ խորհրդարանում Սահմանադրության նախագծին «կողմ» քվեարկելու որոշումը պարտադիր է ԲՀԿ բոլոր անդամների համար:
Չնայած ԲՀԿ-ն նաև հայտարարել է, թե պատժամիջոցներ է կիրառելու կուսակցության այն անդամների հանդեպ, ովքեր դեմ կքվեարկեն սահմանադրական նախագծին, որոշ տեղեկություններով, ԲՀԿ որոշ անդամներ՝ օրինակ, Էլինար Վարդարյանն ու Հայկ Խաչատրյանը դեմ են քվեարկելու նախագծին։ Տեղեկություն կա, որ քվեարկությունից հետո նրանք լքելու են ԲՀԿ-ն՝ միանալով Վարդան Օսկանյանի ստեղծելիք կուսակցությանը։ ԲՀԿ-ական Էլինար Վարդանյանն այսօր ԱԺ-ում ամեն կերպ խուսափեց պատասխանել մեր հարցին, թե ինչպե՞ս է քվեարկելու սահմանադրական փաթեթին ու արագ հեռացավ։
ԲՀԿ-ական Միքայել Մելքումյանը, մեր հարցին ի պատասխան, ասաց, որ քվեարկության օրը միայն պարզ կլինի, թե ԲՀԿ-ից ով ինչպես է քվերակում։ «Ուրիշ բան է, որ մարդիկ կան, որ իրենց քաղաքացիական դիրքորոշումը նախօրոք հայտնել են, և մենք գիտենք նրանց մասին, որոնք մեր կուսակցության անդամները չեն»,- ասաց Մելքումյանը։
Էլինար Վարդանյանի քվեարկության մասին Մելքումյանն ասաց, որ ինքը որևէ տեղ չի հանդիպել, որ Էլինար Վարդանյանն ասի՝ դեմ է կամ ձեռնպահ է։ «Իսկ Օսկանյանի և Վահե Հովհաննսիյանի մասին գիտեմ մամուլից։ Ե՛վ Օսկանյանը, և՛ Վահե Հովհաննիսյանն ասել են, որ իրենց որոշումը «ոչ»-ն է»։
ԲՀԿ-ական պատգամավորի խոսքերով՝ ԲՀԿ-ն 30-ից ավելի առաջարկներ է ներկայացրել սահմանադրական հանձնաժողովին, որոնց մեծ մասն ընդունվել է։
Մանրամասները՝ տեսանյութում։
