Կոստանդնուպոլսի Հայոց պատրիարքության միաբան Տ. Զաքեոս ծայրագույն վարդապետ Օհանյանը «Առաջին լրատվական»-ի հետ զրույցում, անդրադառնալով վերջին մի քանի ամիսներին Պոլսո Հայոց պատրիարքության հասցեին հնչող քննադատություններին՝ կապված իշխանամետ լինելու հետ, նշեց. «Ես չգիտեմ, թե այս անհանգստությունը որտեղից է բարձրանում, բայց Թուրքիայում իսկապես քաղաքական շատ դժվար կացություն է, որից բոլոր քաղաքացիները , նաև հայերն են ազդեցություն կրում և դժվարություն ունեն: Այս ճգնաժամային օրերին հայոց պատրիարքարանը պաղարյունությամբ և իմաստնությամբ մոտեցավ հարցերին, և կարողացավ համախմբել ամբողջ պոլսահայությանը. մեր համայնքային կյանքը շարունակվում է: Ամեն քաղաքացի մի քիչ իրեն անապահով է զգում, բայց ոչ որպես հայ, այլ որպես Թուրքիայի քաղաքացի»:
Մամուլում բազմիցս քննադատվեց, որ ապրիլի 24-ին Թուրքիայից՝ Պոլսո պատրիարքությունից որևէ ներկայացուցիչ չեկավ Հայաստան, այդ թվում նաև պատրիարքը: «Այս հարցին պատասխանելն իմ իրավունքը չէ,- նշեց Հայր սուրբը, բայց ապրիլ 24-ին Ստամբուլի աթոռանիստ մայր եկեղեցում մատուցվեց հոգեհանգստյան ս. Պատարագ: Այդպիսով՝ մեր մասնակցությունն ունեցանք համահայկական միջոցառմանը»:
Նա նաև նշեց, որ այսօր անհրաժեշտություն կա պատրիարքի ընտրության: «Պատրիարքական մեր աթոռի գլխավորությամբ, անշուշտ, փափագում ենք, որ ընտրությունը կատարվի, փաստ է, որ պոլսահայությունը պատրիարքի կարիք ունի, պատշաճ դիմումներ են գրվել, պատշաճ անձանց ենք դիմել, սպասում եք պատասխանի կառավարությունից»:
Տեր Զաքեոս վարդապետը չժխտեց, որ որպես Թուրքիայի համայնք, լուրջ խնդիրներ ունեն՝ կալվածքների հետ կապված: Իսկ այն լուրերը, ըստ որոնց՝ Թուրքիայում կնունքներ իրականացնելը մատչելի չեն, 2000 դոլար պետք է վճարել, վարդապետի հավաստմամբ՝ իրականությանը չեն համապատասխանում, նա վստահեցրեց, որ մկրտության, պսակադրության, հուղարկավորության սակագներ կան, բայց ցածր, և ով որ գումար չունի, ձրի կարող է օգտվել: «Մենք մեր յուղով ենք տապակվում, արտասահմանից գումարներ չենք ստանում»,- նշեց Հայր սուրբ, Տեր Զաքեոս վարդապետը: