«Առաջին լրատվական»-ի զրուցակիցն է ԱԺ ՕԵԿ-ական պատգամավոր Հովհաննես Մարգարյանը:
– Պարոն Մարգարյան, երկուշաբթի օրը արդեն քվեարկության է դրվելու Սահմանադրական փոփոխությունների նախագիծը: «Օրինաց երկիր» խմբակցությունը վերջապես որոշե՞լ է, թե ինչպես է քվեարկելու:
– Մենք մեր հինգ ամփոփ առաջարկները ներկայացրել ենք և դեռ վերջնական պատասխանը չենք ստացել: Կլինի պատասխանը, դրան հաշված ժամեր են մնացել, և մենք դա կքննարկենք: Ընդ որում՝ ոչ միայն ՕԵԿ-ում, այլև «Հայկական վերածնունդ» հասարակական-քաղաքական միավորումում կքննարկենք, քանի որ դրանք այդ կառույցի առաջարկներն են:
– Վերջին անգամ ե՞րբ եք հանդիպել Սահմանադրական փոփոխությունների հանձնաժողովի անդամների հետ:
– Մի քանի օր առաջ: Վերջին քննարկումը երկու օր առաջ է եղել: Այս ընթացքում մենք շուրջ յոթ-ութ քննարկում ենք ունեցել:
– Եվ մասնագիտական հանձնաժողովը Ձեր ներկայացրած առաջարկությունները ներառե՞լ է փոփոխությունների նախագծում:
– Ընթացքում անգամ եղան դեպքեր, որ որոշ առաջարկներ արդեն ընդունվել էին: Խոսքը վերաբերում է ընտրիչների ինստիտուտի բացառմանը, խոսքը վերաբերում է նաև նախագահի ընտրության շեմի ավելացմանը, թեև մենք պնդում ենք, որ նախագահի ընտրության լեգիտիմություն ապահովելու համար երեք/քառորդի շեմ սահմանենք: Չէ՞ որ ժողովուրդը չի ընտրելու նախագահին, խորհրդարանն է ընտրելու: Խոսքը վերաբերում է նաև հարյուր տոկոսանոց համամասնական ընտրակարգի հստակեցմանը, որը բացառապես իմպերատիվ պայման պետք է լիներ և այլն: Կլինի վերջնական տեքստը, կտեսնենք՝ մեր այս առաջարկություններն ընդունվել են, թե ոչ, և կորոշենք մեր դիրքորոշումը:
– Իսկ մինչև երկուշաբթի նորից կհանդիպե՞ք հանձնաժողովի հետ, որ իմանաք ձեր առաջարկությունները ընդունվել են, թե ոչ:
– Առաջարկներ կային, որ մենք ուղարկել էինք էլեկտրոնային եղանակով: Կարող է նաև չհանդիպենք և այդ ճանապարհով ստանանք պատասխանը: Մենք դեռ նրանց հետ աշխատում ենք:
– Փաստորեն, երկուշաբթի՝ սահմանադրական փոփոխությունների քվեարկության օրը նոր դուք իմանալու եք պատասխանը՝ ձեր առաջարկներն ընդունվել են, թե ոչ: Ձեր բոլո՞ր առաջարկությունները պետք է ընդունվեն, որ կողմ քվեարկեք այդ փոփոխություններին, թե՞ եթե մասամբ էլ ընդունվեն, ձեր խմբակցությունը կողմ կքվեարկի:
– Իհարկե, եթե բոլոր առաջարկություններն ընդունվեն, մենք դեմ չենք լինի սահմանադրական փոփոխությունների նախագծին, քանի որ դրանք բոլորը սկզբունքային են մեզ համար: Եվ այդ առաջարկների ընդունվելու չափով էլ պայմանավորված քննարկում կլինի: Որոշումը կայացվելու է «Հայկական վերածնունդ» կառույցի և ավելի քան 130 հասարակական-քաղաքական կազմակերպությունների մասնակցությամբ:
– Պարոն Մարգարյան, ՕԵԿ նախագահ Արթուր Բաղդասարյանը ձմռանն ասուլիս հրավիրեց և հայտարարեց, որ ՕԵԿ-ը դեմ է այդ փոփոխություններին: Անգամ չէր էլ քննարկվում առաջարկություն ներկայացնելու հարցը, ՀԱԿ և «Ժառանգություն» կուսակցությունների նման դուք նույնպես չէիք ցանկանում մտնել բովանդակային քննարկման մեջ: Ինչո՞ւ հանկարծ փոշմանեցիք և որոշեցիք բովանդակային քննարկման մեջ մտնել:
– Նախ պարոն Բաղդասարյանը հենց այդպես չի ասել: Ինչպես մենք ասել ենք ձմռանը, հիմա էլ ենք ասում, որ գործող Սահմանադրությունը մեղավոր չէ, որ, այո՛, մեր երկրում սոցիալ-տնտեսական ծանր վիճակ է, այո՛, Սահմանադրությունը մեղավոր չէ, որ անպատժելիությունը հասել է իր գագաթնակետին: Սահմանադրությունը մեղավոր չէ, որ օրը ցերեկով մարդիկ են գնդակահարվում, և գնդակահարողները մնում են անպատիժ, գործող Սահմանադրությունը մեղավոր չէ, որ միայն Գյումրի քաղաքում հարյուրավոր ծերեր ու երեխաներ շաբաթվա որոշ օրեր սոված են մնում: Եվ վերջապես՝ Սահմանադրությունը մեղավոր չէ, որ ամեն օր տասնյակ ավտոբուսներ են շարժվում դեպի Ռուսաստան: Ու հիմա էլ ենք ասում, որ այսօր չկա սահմանադրական փոփոխությունների անհրաժեշտություն, մենք այսօր էլ կարող ենք կիսանախագահական համակարգով լավ երկիր կառուցել և լուսավոր Հայաստան ունենալ: Բայց, ինչպես ժողովուրդն է ասում, գնացքը գնացել է, սկսվել է գործընթացը, և մենք՝ որպես առանցքային դերակատարում ունեցող քաղաքական ուժ, չէինք կարող անտարբեր մնալ: Հիմա էլ ենք մենք հարցնում, թե ինչի համար է այս շտապողականությունը: Եկեք՝ հանրաքվեն հաջորդ տարի անցկացնենք, հատկապես եթե նոր Սահմանադրությունը երկու տարի հետո պետք է ուժի մեջ մտնի:
– Միգուցե ձմռանը «Բարգավաճ Հայաստան» կուսակցության նախկին ղեկավար Գագիկ Ծառուկյանի նկատմամբ կիրառված ճնշումնե՞րը պատճառ դարձան, որ դուք էլ փոխեցիք ձեր դիրքորոշումը և որոշեցիք միանալ այդ քննարկումներին:
– ՕԵԿ-ը տարվա բոլոր եղանակներին իր դիրքորոշումը չի փոխում, իր սկզբունքներին տեր է: Եվ հիմա էլ ենք ասում, որ վաղաժամկետ է այդ փոփոխությունների իրականացումը, դրա համար չկա հասարակական-քաղաքական պահանջ: Այո՛, Սահմանադրությունը փոխելու համար չկա լայն կոնսենսուս: Բայց քանի որ գործընթացը սկսվել է, մենք չէինք կարող հեռու մնալ: Մենք պետք է մեր գործուն քայլերով նպաստեինք, որ այն փաստաթուղթը, որը մեր ժողովրդի համար թիվ մեկ փաստաթուղթն է, բարելավվի:
