Արժույթի միջազգային հիմնադրամը համաշխարհային տնտեսության աճի նախկին կանխատեսումները այլևս չի համարում իրատեսական (3.3%՝ 2015-ին և 3.8%՝ 2016-ին), սակայն աճի տեմպերը կգերազանցեն 3%-ը։ Այս մասին Les Echos-ին տված հարցազրույցում հայտարարել է ԱՄՀ ղեկավար Քրիստին Լագարդը։
Այսպիսով՝ նա ազդանշան է տվել համաշխարհային տնտեսական աճի կանխատեսումների հնարավոր վատացման մասին՝ կապված զարգացող երկրներում տնտեսության արգելակման և ֆինանսական շուկաների տենդագին վիճակի հետ։ «Մենք գտնվում ենք վերականգնման գործընթացում, որի տեմպերը դանդաղում են»,- ասել է Լագարդը։
Նրա խոսքով՝ դիտվում է զարգացող և զարգացած երկրների դերերի փոփոխություն. առաջին խմբում, որը նախկինում եղել է համաշխարհային աճի լոկոմոտիվ, աճը թուլանում է, իսկ երկրորդում հակառակը՝ ուժեղանում։
Անցած շաբաթ ամերիկյան Citigroup բանկի վերլուծաբանները նվազեցրել էին 2015-16թթ. համաշխարհային տնտեսության աճի կանխատեսումը՝ Չինաստանում աճի տեմպերի դանդաղման սպառնալիքի պատճառով։