Անկախ սահմանային լարվածությունից՝ «Չեք անցկացնի» քաղաքացիական նախաձեռնության և «ոչ»-ի ճակատի հանրահավաքն այսօր երեկոյան կայանալու է Գյումրիում։ Այս մասին «Առաջին լրատվական»-ի հետ զրույցում ասաց «Չեք անցկացնի» նախաձեռնության անդամ Հրայր Մանուկյանը։
Հանրահավաքին մասնակցելու են քաղաքացիական ակտիվիստներ տարբեր նախաձեռնություններից, իսկ քաղաքական ուժերից, Մանուկյանի խոսքով, մասնակցելու են ՀԱԿ-ը, Նախախորհրդարանը, ներկայացուցիչ է լինելու «Ժառանգություն» կուսակցությունից, ՀԺԿ-ից։ Թե անվանապես ովքեր են լինելու՝ դեռ հստակեցվում է, բայց, կազմակերպիչների խոսքով, ելույթ ունեցողների թվում պատգամավորներ հաստատ կլինեն։
Նշենք, սակայն, որ հանրահավաքի կազմակերպիչները Գյումրիում խոչընդոտների են հանդիպել։
«Չեք անցկացնի» նախաձեռնության անդամ Արշակ Մուսախանյանը, որն արդեն Գյումրիում է, «Առաջին լրատվական»-ի հետ զրույցում ասաց, որ իրենց թույլ չեն տալիս հրապարակում հոսանք միացնել։ «Ո՛չ թատրոնից են համաձայնում հոսանք տալ, ո՛չ այլ ճանապարհով են թույլ տալիս մեզ հոսանք քաշել հրապարակ։ Դրա համար ստիպված պետք է մեզ հետ դվիժոկ տանենք»,- ասաց ակտիվիստը։ Բացի դրանից՝ մեր զրուցակցի խոսքով, այն հրապարակում, որտեղ կայանալու է հանրահավաքը, հենց կենտրոնում մեծ բատուտ է տեղադրված, որը թույլ չեն տալիս հեռացնել։ Ակտիվիստները դիմել են անգամ քաղաքապետարան, սակայն նրանց պատասխանել են, որ բատուտը շահագործում է մասնավոր անձ, որը դրանից շահույթ է ստանում, և իրենք չեն կարող այն հեռացնել տարածքից թեկուզ ժամանակավորապես։
Արշակ Մուսախանյանի խոսքով՝ այս ամենն արհեստական խոչընդոտներ են, որոնցով փորձ է արվում խոչընդոտել հանրահավաքի կայացմանը, բայց, ըստ մեր զրուցակցի, իրենք չեն ընկճվում ստեղծված խոչընդոտներից, և ցանկացած պարագայում հանրահավաքը տեղի կունենա։