Արևմտյան Աֆրիկայում անոմալ չոր եղանակի պատճառով կակաոյի գինը տարվա սկզբից աճել է 13%-ով՝ մոտենալով 4 տարվա առավելագույնին՝ հայտնում է Financial Times-ը: Գնաճը պայմանավորված է առաջիկա տարում կակաոյի մատակարարումների դեֆիցիտի վերաբերյալ ներդրողների մտավախություններով: Արևմտյան Աֆրիկայում երաշտի և Հարավային Ամերիկայում անձրևոտ եղանակի պատճառով կակաոյի համաշխարհային առաջարկի դեֆիցիտը կկազմի մինչև 250 հազար տոննա: Իսկ մինչև 2020թ. կակաոյի պակասի հետ կապված՝ շուկայում կարող է առաջանալ 1 մլն տոննա շոկոլադի դեֆիցիտ՝ կանխատեսում են փորձագետները:
Ապրանքային համաշխարհային բորսաներում կակաոյի գինը շարունակում է աճել: Կակաոյի դեկտեմբերյան մատակարարումների ֆյուչերսային գործարքների գինը կրկին հասել է 2.2 հազար ֆունտ ստերլինգի 1 տոննայի դիմաց: Այս մասին են վկայում Լոնդոնի ապրանքային բորսայի սեպտեմբերի 22-ի առևտրի տվյալները: Նյու Յորքի բորսայում կակաոյի գինը 1 տոննայի դիմաց կազմում է 3.312 հազար դոլար:
