2011-ին գործարար Ռուբեն Վարդանյանը «Խնայբանկ»-ին է վաճառել ներդրումային «Տրոյկա Դիալոգ» ընկերությունը, որը գործընկերների հետ հիմնել էր դեռևս 1991-ին: Բիզնեսը գնահատվել էր 1 մլրդ դոլար, ևս 400 մլն դոլար «Խնայբանկ»-ը վճարել է 2013-ի ամռանը՝ գործարքի առաջին մասից հետո «Տրոյկա»-ի ֆինանսական արդյունքներով:
Այժմ «Խնայբանկ»-ի հետ Վարդանյանին կապում է միայն բանկի նախագահ Գերման Գրեֆի խորհրդականի ձևական պաշտոնը:
Ժամանակի զգալի մասը Վարդանյանը տրամադրում է նախագծերին՝ կապված ժառանգության և մասնավոր կարողությունների փոխանցման հետ:
2015-ի ամռան սկզբին նա բացել է Phoenix Advisors ընկերությունը: Դրա աշխատանքը վերահսկում է «Ռենեսանս Կապիտալ»-ի նախկին նախագահ Ալեքսանդր Մերզլենկոն: Բիզնեսի կարևոր մասը պրոտեկտորատների ստեղծումն է: Պրոտեկտորը (Վարդանյանի ընկերության ներկայացուցիչը) ընտանեկան բիզնեսում ներկայացնում է ժառանգների շահերը: Վարդանյանը բացատրում է, որ այդ ծառայությունն անհրաժեշտ է ընտանեկան ակտիվների պաշտպանության համար:
Phoenix Advisors-ը գործարարին կօգնի մշակել ակտիվների և իրավահաջորդների շրջանակի ռազմավարություն: «Երբեմն այդ շրջանակը չի սահմանափակվում ընտանիքով: Բացի այդ, գործարարները փոխանցում են ոչ միայն փողեր, այլև բիզնես-ակտիվներ: Մենք մասնակցում ենք որպես պրոտեկտորներ և համակարգում գործընթացը. եթե անհրաժեշտ է, օգնում ենք ներգրավել փորձագետների՝ ակտիվների իրացման և բարդ կառույցներ կառուցելու համար»,- ասել է ընկերության տնօրեն Ալեքսեյ Ստանկևիչը:
Իսկ վճարումը կախված է ծառայության տեսակից:
Ըստ երևույթին, Վարդանյանի նոր նախագծին կմասնակցեն նրա անձնական family office Quinta Capital Partners (QCP)-ի հաճախորդները: Այդ ընկերությունը «Տրոկա Դիալոգ»-ի ժամանակաշրջանում զբաղվում էր Վարդանյանի և նրա մտերիմների փողերով:
Ռուբեն Վարդանյանի կապիտալի մեծ մասով զբաղվում է ոչ մեծ ներդրումային «Վարդանյան, Բրոյթման և գործընկերներ» ընկերությունը: Այն վերահսկում է մի քանի միլիարդ դոլար արժողությամբ ակտիվներ, գումարները ներդրված են տասնյակ նախագծերում, որոնք ղեկավարում է Միխայիլ Բրոյթմանի թիմը: Ըստ գնահատականների՝ «Տրոյկա»-ի վաճառքից հետո Վարդանյանին են մնացել «Ավտովազ»-ի (20.5 տոկոս) և «Կամազ»-ի (27.4 տոկոս) բաժնետոմսերի փաթեթները:
«Վարդանյան, Բրոյթման և գործընկերներ»-ը հայկական Ameriabank-ի սեփականատերն է: Այն զբաղվում է նաև վենչուրային նախագծերով: Այսպես, Joule Unlimited-ն արտադրում է էթանոլ և դիզելային վառելանյութ ածխաթթու գազից՝ մանրէների և փոփոխված ԴՆԹ-ի միջոցով, Pronutria-ն փորձում է լուծել առողջ սննդի խնդիրը բիոտեխնոլոգիաների միջոցով, իսկ Big Foot-ը Lamoda հագուստի համացանցային բուտիկի սեփականատերն է:
Ներդրումների զգալի մասը կապված է անշարժ գույքի կառավարման հետ՝ Avica Property Investors International-ի միջոցով: Այստեղ Վարդանյանի գործընկերը Գագիկ Ադիբեկյանն է: Ընկերության նախագծերի շարքում են ներդրումները Dream House, «Տարվա եղանակներ», OBI առևտրի կենտրոններում և «Ռոմանովների պալատ» բիզնես-կենտրոնում:
Ներդրումներ են կատարվում նաև արդյունաբերության մեջ: Վերջին գործարքը նավթ փոխադրող «Բալթտռանսսերվիս»-ի 40 տոկոսի գնումն է Globaltrans-ից:
Սակայն Վարդանյանի և Բրոյթմանի համար ամենաանսովոր նախագիծն է դարձել Ուկրաինայում մետալուրգիական ձեռնարկություններ գնելը՝ «Դոնբասի արդյունաբերական միություն»-ը և «Զապորոժստալի»-ի: Վարդանյանը գործարքն իրականացրել է դեռևս «Տրոյկա Դիալոգ»-ի ղեկավար լինելու ժամանակ: Ըստ Forbes-ի աղբյուրների՝ այդ գործարքից 2010-ին «Տրոյկա»-ն 20 մլն դոլար վարձատրություն է ստացել:
2015-ին Կիպրոսում ստեղծվեց VBP Cyprus ընկերությունը, որը ևս առնչվում է ժառանգության թեմային: Այս դեպքում նրանք պատրաստ են օգնել այն ժառանգներին, ովքեր չեն ցանկանում զբաղվել բիզնեսով: Ընկերության ներկայացուցիչներն իրենց վրա կվերցնեն բաժնետերերի, ֆիրմայի ղեկավարների դերերը և այլն: «Վարդանյան, Բրոյթման և գործընկերներ»-ը նախատեսում է դրանից ստանալ շահույթի 50 տոկոսը: Այժմ ընկերությունն ունի մոտ 30 մլն դոլար եկամուտ:
Բարեգործությանը Ռուբեն Վարդանյանն ավելի շատ ժամանակ է հատկացնում, քան ֆինանսներին: 2015-ի մարտին Վարդանյանը Նյու Յորքում հայկական սփյուռքի առաջնորդների, ինպես նաև դերասան Ջորջ Քլունիի և նրա կնոջ՝ փաստաբան Ամալ Ալամուդինի հետ Հայոց ցեղասպանության 100-ամյակի նախօրեին թողարկել է «100 կյանք» նախագիծը: Նախագծում նա ամեն տարի Aurora Prize պարգևատրության շրջանակներում 1 մլն դոլար է հատկացնում մարդկանց, ովքեր իրենց վտանգի են ենթարկել հանուն այլոց փրկության: Մրցանակն անվանակոչել են Ավրորա Մարդիգանյանի պատվին, ում ընտանիքը զոհվել է Ցեղասպանության ժամանակ:
Վարդանյանը ոչ միայն զբաղվում է բարեգործությամբ, այլև ցանկանում է այն վերածել գործունեության սիստեմատիկ տեսակի: Այդ նպատակների համար ստեղծված Philin նախագիծը ղեկավարում է «Տրոյկա Դիալոգ»-ի օպերացիոն բլոկի նախկին ղեկավար Իրինա Իկոնիկովան: Նա կզբաղվի ռուսական ՀԿ-ների ենթակառուցվածքների և բարեգործական հիմնադրամների աջակցությամբ: