Հունահռոմեական ոճի ըմբշամարտի աշխարհի կրկնակի չեմպիոն Արթուր Ալեքսանյանի համար առաջնահերթ է Օլիմպիական չեմպիոն դառնալը:
«Շատ ուրախ եմ, որ երկրորդ տարին անընդմեջ դարձա աշխարհի չեմպիոն: Աշխարհի չեմպիոն դառնալ շատ բարդ էր, բայց ավելի բարդ է տիտղոսը պահպանելը: Ես այս մրցումներում հասկացա, որ այժմ ֆիզիկապես եւ ֆունկցիոնալ ավելի պատրաստ եմ, հենց նույն պարսիկ ըմբիշի հետ մենամարտում: Այս տարիների ընթացքում մենք ճիշտ աշխատանք ենք կատարել մարզչական շտաբի հետ համատեղ:
Ամեն ինչ անելու եմ, որ նույն մարզավիճակում մնամ մինչև Օլիմպիական խաղերը: Ես փորձելու եմ նվաճել նաև օլիմպիական ոսկին»,- լրագրողների հետ զրույցում ասել է աշխարհի կրկնակի չեմպիոնը:
Հիշեցնենք, որ Լաս-Վեգասում կայացած աշխարհի առաջնությունում Ալեքսանյանը կրկին անգերազանցելի էր 98 կգ քաշային կարգում։ Նա եզրափակչում 3։0 հաշվով առավելության էր հասել օլիմպիական չեմպիոն Հասեմ Ռեզաեի նկատմամբ։
