«Ժառանգության» պատգամավոր Զարուհի Փոստանջյանը չի հավատում Սերժ Սարգսյանի այն հայտարարությանը, թե սահմանադրական փոփոխություններից հետո ինքը չի ցանկանում լինել վարչապետ կամ Ազգային ժողովի նախագահ: «Ես չեմ հավատում Ս. Սարգսյանին՝ սկսած այն ժամանակից, երբ նա իբր թե գիտական մի խումբ էր կազմել, որն իբր թե սպիդի բուժման դեղամիջոցն էր հայտնաբերել: Եվ իհարկե, ավարտված այս վերջին ավանտյուրաներով, երբ մենք մեկ գիշերվա մեջ ականատեսը եղանք նրա այն որոշմանը, թե Հայաստանը չի ցանկանում ընդգրկվել Եվրամիության մերձեցման գործընթացում և չի ցանկանում ստորագրել Ասոցացման համաձայնագիրը: Հակառակը՝ ցանկանում է ընդգրկվել մի տարածքում, որը շատ խոցելի է դարձնում հայկական պետականությունը և անտեսում է հայ ժողովրդի շահը»,- «Առաջին լրատվական»-ի հետ զրույցում ասաց Զ. Փոստանջյանը:
Վերջինս հավելեց, որ Ս. Սարգսյանը սահմանադրական փոփոխությունները նախաձեռնել է՝ նախ մինչև 2018 թվականը իր իշխանությունը պահելու և հավերժ իշխանության մնալու համար:
Անդրադառնալով նախկին նախագահ Ռոբերտ Քոչարյանի՝ սահմանադրական փոփոխությունների դեմ պայքարելուն, Զ. Փոստանջյանը հավելեց, թե դատապարտված ու բանտախցերում գտնվող մարդիկ նույնպես կարող են կարծիք հայտնել: «Ինքն է օգնել Սերժ Սարգսյանին բարձր պաշտոնով ապահովելու հարցում: Ես մերժում եմ նրա՝ ակտիվ քաղաքականության մեջ լինելը»,- եզրափակեց պատգամավորը: