ԱՄՆ-ին հաջողվել է ստանալ Ռուսաստանի համաձայնությունը Լեռնային Ղարաբաղի շփման գծի վերահսկողության համատեղ գործողությունների հարցում:
Հունիսի սկզբին Ռուսաստանի նախագահ Վլադիմիր Պուտինի` Եվրոպական խաղերի առթիվ Բաքու այցի ժամանակ գաղտնի պայմանավորվածություն է ձեռք բերվել, թե՝ Ադրբեջանը կարող է սահմանափակ ռազմական գործողություններ սկսել Լեռնային Ղարաբաղում: Այս մասին ZN.ՍA-ին հայտնել է Հայաստանի ազգային անվտանգության նախկին ղեկավար Դավիթ Շահնազարյանը:
Սակայն, նրա խոսքով, վերջին ամիսներին Վաշինգտոնը տարածաշրջանում ակտիվացրել է իր դիվանագիտական ջանքերը և ամեն ինչ արել՝ «թեժ փուլի» մեկնարկը կանխելու համար: Շահնազարյանի կարծիքով՝ Ռուսաստանին այլ բան չի մնում անել, քան համաձայնել ԱՄՆ-ի պայմաններին:
«Լեռնային Ղարաբաղի կարգավորման շուրջ բանակցային գործընթացը՝ ԵԱՀԿ Մինսկի խմբում ԱՄՆ-ի ջանքերով, ավելի ակտիվ փուլ է թևակոխել: Հարավային Կովկասում կայունություն ապահովելու հարցում Միացյալ Նահանգներին հաջողվել է համատեղ գործողությունների հարցում Ռուսաստանի պաշտոնական համաձայնությունը ստանալ՝ առաջարկելով Լեռնային Ղարաբաղի հակամարտության շփման գծում վերահսկողության համագործակցություն: Չնայած չեմ կարծում, որ առաջիկայում բանակցություններում լուրջ առաջընթաց գրանցվի»,- ասել է Շահնազարյանը:
