Ռուսական RIA Novosti լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն այսօր Անկարայում G20-ի շրջանակներում կազմակերպված գործարար ֆորումի ժամանակ հայտարարել է, որ Թուրքիայի սահմանամերձ մի շարք քաղաքներում սիրիացի փախստականների թիվը գերազանցել է տեղական բնակչությանը:
«Մեր դռները մշտապես բաց են փախստականների համար։ Այսօր Թուրքիայում գտնվում են մոտ 1.7 միլիոն սիրիացի փախստական և մոտ 200.000 իրաքցի փախստական։ Սահմանային մի շարք քաղաքներում փախստականների թիվն արդեն իսկ գերազանցել է տեղական բնակչությունը։
Օրինակ՝ Քիլիսում ներկա դրությամբ բնակչության 54 տոկոսը կազմում են սիրիացիները։ Չնայած նման իրավիճակի ստեղծմանը՝ Թուրքիայում տեղաբնակ բնակչությունը զանգվածային ակցիաներ չի անցկացնում փախստականների դեմ։ Ես հպարտ եմ, որ փախստականներին ընդունող երկրի վարչապետն եմ»,- ասել է Դավութօղլուն։
Թուրքիայի 10 նահանգներում փախստականների համար կառուցվել են ավելի քան 20 վրանային ճամբարներ ու տնակային քաղաքներ։ Սակայն դրանցում բնակվում է փախստականների միայն 1/5-ը, մնացյալը ցրվել են Թուրքիայի տարբեր քաղաքներով։ Թուրքիան սիրիացի փախստականներին օգնելու վրա ծախսել է մոտ 6 միլիարդ դոլար։