Ն.Ս.Օ.Տ.Տ. Գարեգին Բ ծայրագույն պատրիարք և Ամենայն Հայոց կաթողիկոսը սեպտեմբերի 4-ին Մայր Աթոռ Սուրբ Էջմիածնում ընդունել է ԱՄՆ Արևելյան հայոց թեմի ուխտավորների` ուղեկցությամբ թեմի հոգևոր սպասավոր Արժանապատիվ Տ. Գարեգին ավագ քահանա Գասպարյանի:
Ինչպես տեղեկացրին Մայր Աթոռի տեղեկատվական համակարգից, շնորհակալություն հայտնելով Ամենայն Հայոց կաթողիկոսին ջերմ ընդունելության համար` Տեր Գարեգինը ներկայացրել է խմբի անդամների եկեղեցանվեր ծառայությունը, ապա ընդգծել, որ Մայր Աթոռ ուխտավորների այցը և Նորին Սրբության հետ հանդիպումները առիթ են ընձեռում մոտիկից ծանոթանալու Հայ եկեղեցու նվիրական արժեքներին և ավելի զորանալու իրենց հավատի մեջ:
Այնուհետև ուխտավորներին իր օրհնությունն ու պատգամն է բերել Գարեգին Բ Ամենայն Հայոց կաթողիկոսը: Նորին Սրբությունը բարձր է գնահատել Տ. Գարեգին ավագ քահանա Գասպարյանի բազմամյա նվիրյալ ծառայությունը ԱՄՆ Արևելյան հայոց թեմում, ինչպես նաև կարևորել է ներկա հավատավոր հայորդիների գործուն ներգրավվածությունը ծխական-համայնքային կյանքում:
Ի պատասխան հարցումների, անդրադառնալով Սփյուռքում հայապահպանության խնդիրներին, Վեհափառ Հայրապետն ի մասնավորի ընդգծել է, որ եկեղեցին և եկեղեցականները պիտի շարունակեն ամեն ջանք գործադրել պատանի սերնդի քայլերը դեպի եկեղեցի առաջնորդելու և երիտասարդների հոգում ազգային-հոգևոր նվիրական արժեքների հանդեպ սերն ու հավատարմությունը արթուն պահելու համար:
Զրույցի ընթացքում Նորին Սրբությունը պատասխանել է ուխտավորների հարցերին, որոնք վերաբերել են սիրահայությանը եկեղեցու կողմից ցուցաբերվող զորակցությանը, Հայոց ցեղասպանության նահատակների սրբադասմանն ու հայոց պահանջատիրությանը, երիտասարդության քրիստոնեական-ազգային դաստիարակության խնդիրներին և եկեղեցի-պետություն հարաբերություններին: