«Մարտական իրավիճակը վերահսկելի է: Հակառակորդը միանշանակ կրում է պատասխան և ավելի շատ կորուստներ: Եվ այդ փաստն արձանագրվում է նաև իրենց մամուլում»,- «Առաջին լրատվական»-ի հետ զրույցում ասաց ՀՀ պաշտպանության նախարարի խոսնակ Արծրուն Հովհաննիսյանը:
Վերջինս նկատեց, որ, այո, Տավուշի մարզի հատվածում, հակառակորդի ակտիվության պարագայում, աշխարհագրական դիրքից ելնելով՝ մոտ 20 գյուղ գնդակոծվում է, բայց այդ գյուղերը լիովին ապահովել որևէ կրակոցից, ցավոք, հնարավոր չէ՝ պայմանավորված աշխարհագրական դիրքով:
Արծրուն Հովհաննիսյանը նկատեց, որ ԼՂ հատվածում լարվածությունն ավելի շատ է, սակայն այդ դեպքում ևս հակառակորդը ստանում է արժանի պատասխան:
ՊՆ խոսնակը նշեց, որ երեկ ՊՆ փոխնախարարը հանդիպել է ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկի հետ, ներկայացրել վիճակը: «Համապատասխան ընթացակարգով միջազգային դիտորդական առաքելություն իրականացնող կազմակերպություններին տեղեկացվում է լարվածության մասին, արդյունքների մասին: Ինչպես միշտ մենք հետևողական ենք լինում և պահանջատեր, որ նման դեպքերում անցկացվեն միջազգային փորձագիտություն, մեղավորները նշվեն, սակայն ադրբեջանական կողմը միշտ մերժում է այդ առաջարկները»,- ասաց Հովհաննիսյանը:
Նշենք, որ այսօր Տավուշի մարզում վիրավորված խաղաղ բնակիչներից զատ՝ հյուսիսարևելյան սահմանին տեղակայված մարտական հենակետերից մեկում այսօր առավոտյան հակառակորդի գնդակից զոհվել է պայմանագրային զինծառայող` 40-ամյա Հայկ Թևոյանը: