Երևանի քաղաքապետարանի՝ բացօթյա առևտրի դեմ պայքարը հասել է գետնանցումներին: Այսօր քաղաքապետարանի առևտրի վարչության աշխատակիցները այցելել են գետնանցումի կրպակներում առևտուր իրականացնող վաճառողներին և տեղեկացրել, որ այլևս իրավունք չունեն իրենց ապրանքը ցուցադրել կրպակի տարածքից դուրս: Ամբողջ ապրանքը պետք է կրպակի ներսում լինի, անգամ դռանը չեն կարող կախիչով հագուստ կախել:
Այս հրահանգը, սակայն, զայրացրել է առևտրականներին: Նրանք պնդում են, որ հնարավոր չէ ամբողջ ապրանքը ցուցադրել նեղ կրպակում:
«Առևտրի վարչության պետն եկել ինձ ասում է, թե ինչու եք էդքան ապրանք բերել, որ չեք կարողանում կրպակում տեղավորել, հանել լցրել եք դուրսը, բայց մենք չենք կարա առանց էդ ապրանքի արենդայի փող տանք, հարկայինի փող տանք, հազար ու մի հարկատեսակ փակենք: 1 քկմ կրպակի համար 100-200 հազար դրամ մենակ արենդայի փող ենք տալիս: Բա դա ո՞նց փակենք»,- «Առաջին լրատվական»-ի հետ զրույցում ասաց վաճառողներից մեկը:
Մեկ ուրիշն էլ դժգոհեց, որ այսօրվա ընթացքում, ինչ ապրանքը չեն ցուցադրել, ոչ մի դրամի առևտուր չի արել: «Մարդիկ սովոր են, որ ապրանքը վիտրինայում ցուցադրվի, անցնում են, տեսնում՝ կախված է, ու մտնում են շատ պատահական առնում գնում: Բայց այսօր, ինչ ապրանքը լցրել եմ կրպակ, ոչ մի բան չեմ վաճառել»,- ասաց մեկ այլ վաճառող:
Ի դեպ, այսօր առևտրականների մի խումբ հավաքվել և հարցը բարձրացրել է թաղապետ Արմեն Սարգսյանի մոտ, սակայն թաղապետն ասել է, որ դա է լուծումը, մի կերպ հարմարվեք:
Առևտրականները, սակայն, վստահ են, որ «այս քայլով քաղաքապետարանը, թաղապետարանը, տարբեր չինովնիկներ փորձում են վերջնականապես փակել փոքր ու միջին բիզնեսը, որպեսզի բոլորին ուղղորդեն դեպի իրենց հսկայական մոլերը»: