Սիրիական հակամարտությունը, որի հետևանքով զոհվում է մեծապես քաղաքացիական բնակչությունը, ձեռք է բերում միջազգայինի գծեր: TASS-ի փոխանցմամբ՝ այսպիսի եզրակացություն է պարունակվում Սիրիայում մարդու իրավունքների հնարավոր խախտումների հետաքննության հարցերով ՄԱԿ-ի հանձնաժողովի հերթական զեկույցում, որը հրապարակվել է Ժնևում:
Թեև ռազմական գործողությունների մասնակիցների մեծ մասը սիրիացի են, և հակամարտությունը զգալիորեն մնում է սիրիական տարածքի ներսում, այն ավելի ու ավելի է ուղղորդվում միջազգային և տարածաշրջանային տերությունների կողմից, նախևառաջ՝ նրանց աշխարհաքաղաքական շահերին համապատասխան՝ ասվում է փաստաթղթում, որն ընդգրկում է այս տարվա հունվարի 10-ից հուլիսի 10-ն ընկած ժամանակաշրջանը: Իսկ սիրիացիներն աստիճանաբար կորցրել են իրավիճակի նկատմամբ վերահսկողությունը, ընդ որում՝ դա վերաբերում է հակամարտության բոլոր կողմերին:
«Որքան պատերազմը շարունակվում է, հայտնվում են միջազգայնացման՝ անհանգստություն առաջացնող նշաններ»,- կարծում են փորձագետները:
«Մարտնչող կողմերը ռազմական գործողություններ են վարում՝ քիչ կամ ընդհանրապես ուշադրություն չդարձնելով պատերազմի օրենքներին և, մասնավորապես, հիմնարար տարբերության սկզբունքին (մարտնչողների և քաղաքացիական բնակչության միջև): Խիտ բնակեցված շրջանների վրա առանց խտրականության հարձակումները հանգեցնում են մեծ թվով սպանվածների և վիրավորների քաղաքացիական բնակչության շրջանում»,- նշվում է զեկույցում:
Հանձնաժողովը պատերազմող կողմերին կոչ է արել ապահովել քաղաքացիական բնակչության պաշտպանությունը: Միջազգային հանրությանը կոչ է ուղղվել զենքի տարածումը և մատակարարումները սանձել, ընդլայնել բնակչությանը հատկացվող մարդասիրական օգնությունը, ապահովել ապաստան խնդրողների պաշտպանությունը: