Այսօր Ավան և Նոր Նորք վարչական շրջանների ընդհանուր իրավասության դատարանում շարունակվեց սպանված ազատամարտիկ Վարդան Թումանյանի գործով դատական նիստը, որը վերջին երկու անգամ հետաձգվում էր ամբաստանյալների բացակայության պատճառով:
Հիշեցնենք, որ ազատամարտիկի սպանության մեջ մեղադրվում են Ջունգլ մականունով Գևորգ Սարգսյանը և նրա ազգականներ Սարգիս Ղուկասյանը և Վիկտոր Հովսեփյանը, որոնց խափանման միջոց կալանքը փոխարինվել է ստորագրությամբ չհեռանալու մասին:
Ջունգլը այսօր դատարանում հայտարարեց, որ ինքը դատական նիստին չէր մասնակցում, քանի որ ավտովթարի էր ենթարկվել, հայտնվել էր հիվանդանոցում, վերակենդանացման բաժանմունքում և նոր է միայն դուրս եկել հիվանդանոցից: Սակայն, որքան էլ ուշագրավ է, նա դատարանին չներկայացրեց ոչ բժշկական որևէ փաստաթուղթ իր առողջական խնդիրների մասին, ոչ էլ վթարի մասին հավաստող որևէ այլ փաստ: Իսկ Սարգիս Ղուկասյանը նշեց, որ «նիտո» բան էր կերել և թունավորվել էր, դրա համար էլ չէր գալիս նիստերին՝ ևս չներկայացնելով որևէ հիմնավորում:
Ամեն դեպքում դատարանը հիմնավոր համարեց նրանց բացակայությունը և սկսեց դատական նիստը: Նիստի ժամանակ դատարանը իրար միացրեց երկու տարբեր գործերով վարույթները, և այսուհետ Գևորգ Սարգսյանի, Սարգիս Ղուկասյանի ու Վիկտոր Հովսեփյանի գործերը կքննվեն նույն վարույթում:
Նշենք, որ դատական նիստի ժամանակ սպանված ազատամարտիկի կինը հանդես եկավ ուշագրավ հայտարարությամբ, թե Ջունգլն ու Սարգիսը ժամանակ առաջ ոստիկան են ծեծել, և հիմա Երևան քաղաքի վարչությունում քննվում է այդ գործը: Տիկին Տանյան դատարանից խնդրեց պարզել այդ դեպքի մանրամասները, որոնք լավագույնս են բնութագրում ամբաստանյալների ով լինելը: Բացի այդ, նա դատարանից խնդրեց պարզել ամբաստանյալների նշած վթարի հանգամանքները, քանի որ իրենք պարզել են, որ վթարը բոլորովին այլ վայրում է եղել, և ամբաստանյալները ոչ թե քաղաքից են դուրս եկել, այլ փորձել են սահմանը հատել: Դատարանը, սակայն, նշեց, որ այդ հարցերին անդրադարձ կատարելը իր իրավասությունների շրջանակում չէ:
Մինչդեռ նիստի ավարտից հետո սպանված ազատամարտիկի քույրը՝ Մարիետա Թումանյանը, «Առաջին լրատվական»-ի հետ զրույցում նշեց, որ իրենք հավաստի տեղեկություններ ունեն, որ Ջունգլը և իր «ոհմակի անդամները» փախուստի փորձ են արել, սակայն վթարի են ենթարկվել, մինչդեռ նրանք ազատության մեջ են՝ ստորագրությամբ չբացակայելու պայմանով:
Տիկին Մարիետան ևս մեկ անգամ նշեց, որ «մարդասպանների ազատության մեջ հայտնվելու հարցում մեծ դեր է խաղացել կոռուպցիան»:
Հիշեցնենք, որ ըստ մեղադրանքի՝ Սարգիս Ղուկասյանին և Գևորգ Սարգսյանին մեղադրանք է առաջադրվել այն բանի համար, որ նրանք Վիկտոր Հովսեփյանի հետ ծեծի են ենթարկել Վարդան Թումանյանին՝ դիտավորությամբ նրա առողջությանը պատճառելով միջին ծանրության վնաս՝ առողջության տևական քայքայումով:
