Ադրբեջանական Turan լրատվական գործակալության փոխանցմամբ՝ 2015 թվականի առաջին 8 ամիսներին պաշտպանության և անվտանգության ոլորտում Ադրբեջանի կորուստները կազմել են 50 մարդ։ Այդ մասին հայտնել է Ռազմական հետազոտությունների կասպյան ինստիտուտը (Caspian Defense Studies Institute)՝ հենվելով ԶԼՄ-ներում ու սոցցանցերում անցկացրած մոնիթորինգի տվյալների վրա։
Ընդհանուր կորուստներից 21-ը մարտական կորուստներ են։ 3 զինծառայող պայթել է ականների վրա։ Բացի դրանից՝ կատարվել է 8 ինքնասպանություն։ 8 անգամ զինծառայողները կանոնադրական հարաբերությունները խախտելու հետևանքով կրակել են միմյանց վրա։ 3 զինծառայող զոհվել է անզգուշության հետևանքով, երկուական զինծառայողներ մնացել են ձյան տակ, մահացել են արևի հարվածից ու հիվանդություններից։
Զոհվածներից 44-ը պաշտպանության նախարարությունից են, 2-ը՝ Սահմանապահ ծառայությունից, 2-ը՝ ԱԻՆ-ից, 1-ը՝ Ազգային անվտանգության նախարարությունից։ Հաշվետու ժամանակահատվածում 10 զինծառայող վիրավորվել կամ տարբեր պատճառներով ստացել է մարմնական տարբեր վնասվածքներ։
Caspian Defense Studies Institute-ը չի բացառում, որ զոհերի իրական թիվը կարող է լինել ավելի մեծ։ Ինստիտուտը ստեղծվել է 2014 թվականին Գերմանիայում։ Այն գլխավորում է փորձագետ Ջասուր Մամեդովը (Սումերենլին)։
