Haqqin.az պորտալի փոխանցմամբ՝ Ադրբեջանի ԱԳՆ-ն արձագանքել է լրագրողուհի Խադիջա Իսմայլովային 7.5 տարվա ազատազրկման դատապարտելու կապակցությամբ Արևմուտքի հնչեցրած քննադատություններին։ Ադրբեջանի ԱԳՆ մամլո ծառայության տարածած հայտարարությունում նշված է. «Մենք կտրականապես դատապարտում և անընդունելի ենք համարում Խադիջա Իսմայլովայի կապակցությամբ դատարանի գործերին միջամտելու, դատական որոշումը քաղաքականացնելու ու ըստ էության այն խեղաթյուրելու փորձերը, ինչպես նաև տվյալ հարցի նկատմամբ վերաբերմունքը, որը բացառապես գտնվում է իրավական հարթությունում»։
Ադրբեջանի ԱԳՆ-ն Արևմուտքին մեղադրել է իր հանդեպ «կանխակալ վերաբերմունքի» համար և ընդգծել է, որ նման փորձերը գնահատում է որպես Ադրբեջանի Հանրապետության ինքնիշխանությանը միջամտելու անմիջական փորձ։ Ադրբեջանի ԱԳՆ-ն հայտարարել է, որ Ադրբեջանում «ամբողջովին ապահովվում» են օրենքի գերակայությունն ու դատական իշխանության անկախությունը։
