Թուրքական Hürriyet Daily News թերթի փոխանցմամբ՝ Իսրայելի ԱԳՆ բարձրաստիճան ներկայացուցիչ Դորե Գոլդը ողջունել է Թուրքիայի արտգործնախարարի պաշտոնում Ֆերիդուն Սինիրլիօղլուի նշանակումը։ Նա ընդգծել է, որ դա հնարավորություն է թուրք-իսրայելական հարաբերությունները կարգավորելու համար՝ չնայած երկու երկրների միջև վերջին տարիներին առկա մի շարք տարաձայնություններին։
Գոլդն ընդգծել է, որ կան մի քանի պատճառներ, որոնք հույս են ներշնչում երկու երկրների միջև հարաբերությունները կարգավորելու համար։ Նա հիշեցրել է, որ հունիսի երկրորդ կեսին Սինիրլիօղլուն Հռոմում մասնակցել էր թուրք-իսրայելական գաղտնի հանդիպմանը, որի ժամանակ քննարկվել է երկկողմ հարաբերությունների կարգավորումը։
Այդ հանդիպման արդյունքներով կողմերը պայմանավորվել են նոր հանդիպում կազմակերպել մոտ ապագայում։ Իսրայելցի դիվանագետը թուրք-իսրայելական հարաբերությունների կարգավորումը կարևորել է «իրանական էքսպանսիայի ժամանակաշրջանում»՝ հիշեցնելով, որ Իսրայելն ու Թուրքիան Սառը պատերազմի ժամանակ երկար տարիներ ռազմավարական գործընկերներ են եղել և համատեղ են դիմակայել ԽՍՀՄ-ին։
Գոլդը նաև կարևորել է այն, որ Թուրքիան ներկայումս միացել է ԴԱԻՇ-ի դեմ պայքարին՝ հայտարարելով, որ ջիհադական խմբերը սպառնալիք են ոչ միայն Թուրքիայի, այլև Իրաքի, Սիրիայի ու Իսրայելի համար, որ ԴԱԻՇ-ը ներկայումս գործունեություն է ծավալել Սինայի թերակղզում և համագործակցում է ՀԱՄԱՍ-ի հետ։ Գոլդի խոսքով՝ Իսրայելն ու Թուրքիան շահագրգռված են հարաբերությունների զարգացմամբ։