Գագիկ Ծառուկյանին պատկանող «Առինջ մոլ» առևտրի կենտրոնի գործունեությունից տուժում է ոչ միայն Աշոտ Աղաբաբյանին պատկանող «Հրազդան» տոնավաճառը, այլև Մալաթիայի շուկան: Մալաթիայի շուկայի վաճառողների խոսքով՝ ինչ այդ շուկան բացվել է, իրենց շուկա մարդ չի մտնում, իսկ պատճառն այն է, որ մարզերից մարդկանց ավտոբուսներով շաբաթ-կիրակի օրերին բերում են «Առինջ մոլ» ու հետ տանում:
«Միանշանակ, «Առինջ մոլ»-ի պատճառով մեր գործը տուժում է: Մարդկանց ավտոբուսներով ռայոններից բերում են, անգամ Գյումրիից են ավտոբուսներով ձրի բերում, տանում են «Առինջ մոլ» ու առևտրից հետո նորից ժամը 16-ին հետ են տանում: Իսկ մեր ապրանքը մնացել է մեզ վրա: Կապ չունի, թե էդ հիմնարկները Գագիկ Ծառուկյանի՞ն են պատկանում, թե՞ ոչ, սաղին օգուտ ա տալիս, թե ինչ, բայց մեզ կոնկրետ վնաս է տալիս: 100 հոգու տուն լցնում է, բայց 1500-ի տունն էլ քանդում է: Շաբաթ-կիրակի օրերին, երբ մեր առևտուր անելու օրերն էին, ինչքան ժամանակ է՝ մարդ չկա, իսկ «Առինջ մոլ»-ում ասեղ գցելու տեղ չկա»,- ասաց մեր զրուցակից վաճառողը:
Նրա խոսքով՝ Մալաթիայի տոնավաճառից ևս շատ վաճառողներ տեղափոխվել են «Առինջ մոլ»: «Անունը դրել է անվճար, բայց ամեն մեկը 2 միլիոն փող են տալիս սկզբից: Ու էլի սաղ գնում են այնտեղ ու խփում մեր գործին»,- եզրափակեց մեր զրուցակիցը:
Հիշեցնենք, որ «Առինջ մոլ»-ը բացվեց այն ժամանակ, երբ ԱԺ ՀՀԿ-ական պատգամավոր, «Հրազդան» տոնավաճառի սեփականատեր Աշոտ Աղաբաբյանը բարձրացրեց իր շուկայի վաճառողների վարձավճարները, ինչը մեծ բողոք առաջացրեց: Գագիկ Ծառուկյանն էլ, օգտվելով առիթից, իր շուրջը համախմբեց առևտրականներին և 3 տարով անվճար տաղավարներ խոստացավ նրանց: Այդ իսկ պատճառով «Հրազդան» տոնավաճառն արդեն փակման եզրին է: Նույն ճակատագիրը, փաստորեն, սպասվում է մյուսներին:
