Օտարերկրացի ցանցահենները` հիմնականում Ռուսաստանից և Չինաստանից, օգտագործում են ԱՄՆ կառավարական կազմակերպությունների և մասնավոր կառույցների վրա կիբեռհարձակումների արդյունքում ձեռք բերած տեղեկությունն ԱՄՆ հատուկ ծառայությունների ներկայացուցիչներին բացահայտելու համար: Այս մասին գրում է Los Angeles Times-ը` վկայակոչելով ԱՄՆ կոնտրհետախուզական ծառայություններին: Նշվում է, որ չարագործներն ամերիկացի լրտեսների մասին ընդլայնված տվյալների բազա են ստեղծում:
Ցանցահենների գործողությունների արդյունքում «բացահայտվել է ամերիկացի ինժիներների և գիտնականների առնվազն մեկ ընդհատակյա ցանց, որը համագործակցել է գաղտնի օեպրատիվ աշխատակիցների և արտասահմանում ԱՄՆ գործակալների հետ»: ԱՄՆ-ը մտահոգված է, որ նման կերպ կիբեռհանցագործները կարող են բացահայտել ամերիկացի հետախույզների անձը:
Մասնավորապես` թվային վերլուծության միջոցով հնարավոր կլինի պարզել` «ով է հետախուզության աշխատակից հանդիսանում, որտեղ են նրանք ճամփորդում, ով ֆինանսական դժվարություններ ունի, ով` հիվանդություններ, ընդհանուր պատկեր կազմելու համար»: